Bambutwile—Letai kifwa kiyampe ku benu bana
1 Kinenwa kya Leza kitulombola’mba “shandya [nansha inandya] moloke ukasepelela nakampata.” (Nk. 23:24, 25) Dino i dyese dikatampe ku bambutwile baletanga kifwa kiyampe ku lutundu lwabo! Tutu umo wa mu Komite wa Musambo watendele bambutwile bandi amba: “Bubinebine bo bwādi būmi bwabo bonso, o mwanda nami nādi nsakile bwikale būmi bwami bonso.” Lelo bana bafwaninwe kumona bika ku bambutwile babo?
2 Ngikadilo milumbuluke ne bulēme bukatampe: Bambutwile badi na kiselwa kya kukomeneja ngikadilo milumbuluke mu babo bana. Ino ngikadilo keiyukilwangapo ku kanwa kete, iyukilwanga ne ku kutala ne ku kwiula. Shi ke pano, i ngikadilo’ka yomudi nayo? Lelo benu bana bemwivwananga munena’mba “mfwile’ko lusa,” “nkikukambakenye bidi,” ne “ubafu’ko”? Lelo mwilēmekele bulēme bukatampe mu kisaka kyenu? Lelo mutanga mutyima ku bakwenu kitatyi kyobanena? Lelo mwivwananga pemusapwilanga benu bana myanda? Lelo mwikalanga na ino ngikadilo miyampe ku Njibo ya Bulopwe ne pomudi pa banwe bene kwenu ku njibo?
3 Bukomo bwa kumushipiditu ne bupyasakane mu mingilo: Tutu umo ke mulāle myaka 50 mu mwingilo wa kitatyi kyonso uvulukanga’mba: “Ba tata ne mama bādi bifwa bilumbuluke mu kukwata kupwila makasa abidi ne mu bupyasakane bwabo mu mwingilo.” Lelo muloñanga bika biyukilanga’ko benu bana amba musakanga ba mu kisaka kyenu bekale nyeke bakomo kumushipiditu? Le mubandawilanga pamo kisonekwa kya difuku? Lelo mwifundanga kifundwa kya kisaka kitatyi ne kitatyi? Le benu bana bemumonanga mutanga Bible ne mabuku a Sosiete? Le i myanda’ka ivwananga bana mu milombelo yomulombelanga pa mwanda wa kisaka? Lelo mwisambanga nabo myanda ya kumushipiditu yūbaka, mwisambula nabo mawi senene pa bintu bitala bubinebine ne kipwilo? Lelo mudi na kipyupyu kya kutanwa ku kupwila konso ne kutambila mu mwingilo wa busapudi na kisaka kyonso pamo?
4 Banwe bambutwile, langulukai pa kifwa kyomuleta ku benu bana. Letai kifwa kilumbuluke mpata, bine baketembanga’kyo mu būmi bwabo bonso. Mukaja mutadi wendakana umo, udi pano na myaka 70 ne musubu, unena’mba: “Ne pano kifwa kiyampe kya bambutwile bami bene Kidishitu ba buswe kikinkwashanga mpata. Nami nombanga na kininga amba mone kukwata buno bupyani na mutyika mukatampe, kwibwingidija senene mu myaka yonso īya’ko.”