Le ukesamba bika na mwine Hindu?
1 Abe mwine uyukile kala, kudi bene Hindu bavule bashikete mu matanda meshileshile, ne mu ino yetu mwine. Ko kunena’mba, dyakadilwe kantu dino’di, ukatana mwine Hindu mu busapudi. Shi ubamutana, le ukashilula kwisamba nandi namani?
2 Vuluka ino myanda: Bamishonele bavule basapwilanga bene Hindu biyampe banenanga’mba kwibasapwila musapu senene kekulombepo kwifunda myanda mivulevule ya bwine Hindu. Divule betabanga biyampe ku musapu shi wibasapwila bubinebine mu muswelo upēla, na bwino. Ubadikila bidi kwisamba na mutwe wa kisaka. Shi waitabija, nabya ukapēlelwa kusapwila bantu bakwabo ba mu kisaka kyandi. Pokishilulashilula, kokemwekeja bwa abe wiile na musapu utabukile owa uyukile benē njibo nansha bwa abe usaka kwisambila pa Leza umo kete wabine nansha pa bilembwa bijila bya kala kupita byonso. Bene Hindu bavule bamwene Bible bu dibuku dya bantu ba kushika, ino ukokeja kutalula ino mfwatakani na kushintulula amba Bible kanenepo amba bantu kampanda bo ba kumuna bakwabo nansha musaka kabidye o wa kwikala mutabuke mikwabo.
3 Ingidija bingidilwa bifwaninwe: Kudi mikanda ibidi ilupwidilwe bene Hindu. I ino, Pourquoi adorer Dieu en amour et en vérité ? ne Nos Problèmes — Qui nous aidera à les résoudre ? Ayo yonso i milupulwe mu Falanse. Ino mukanda “Monaipo bidi! Nalonga bintu byonso ke bipya” ne Dieu se soucie-t-il vraiment de nous ? nayo ikwashanga bininge kitatyi kisapwilwa bene Hindu. Ukokeja kwingidija mukanda Kisaka Leza ne dibuku Buyuki pa kwendeja bifundwa bya Bible.
4 Alula na mwanda omwitabija banwe bonso: Kutana mwanda omwiitabija na bene Hindu ke kukomo’po. Bakulupile amba tudi mu kitatyi kyenda bubi muongo pa ntanda, amba Leza usa kufundula makambakano a ino ntanda na kuleta’ko kinzengele kikatampe, kupwa ke myaka ya bubinebine. Ubamone kala amba ino nkulupilo i mikwatañane na bufundiji bwa mu Bible bwisambila pa mafuku a mfulo, pa kyamalwa kibūke, ne pa ntanda impya īya kumeso. Bene Hindu bavule bamwene amba būmi i buyule makambakano onkaonka akubulwa mpwilo, o mwanda basangelanga kwisambila pa myanda ya būmi bwa kisaka, bupolapola ne mutyima-ntenke, ne pa bifikilanga muntu shi wafu. Ivwana ino misapwilo ibidi yokokeja kutompa:
5 Uno ukokeja kusangaja muntu udi na kisaka:
◼ “Ñendanga mpempula bantu batompola pangala pa ngikadilo idi’mo bisaka mu matanda mavule dyalelo. Molangila, i bika bikokeja kukwasha kisaka kikale nyeke umbumo? [Muleke akulondolole.] Bantu bamobamo bayukile myanda inena bisonekwa bya bene Hindu pangala pa kisaka, ino kebeidingakenye kasha na binena’po Bible. Nsaka pano tutange nobe uno mulangwe udi mu Kolose 3:12-14.” Shi ubapu kutanga kisonekwa, mulombole shapita 15 mu dibuku Buyuki, kupwa nena’mba: “Nsaka tupityije nobe kitatyi kityetye tutanga uno shapita.”
6 Nkasampe ukokeja kwitaba biyampe ku uno:
◼ “Ndyukile amba witabije Leza. Molangila, Leza witukadile’ko mpango’ka?” Muleke akulondolole. Kupwa tanga Ngalwilo 1:28, nena’mba: “Mu bifuko bivule bya ntanda bantu i befimpile pamo bā, kadi badi mu makambakano onkaonka. Ulanga Umpangi udi na mutyima wa kwitukwasha tupwije ano makambakano?” Teja malondololo andi, kupwa nyemena ku dibuku kampanda difwaninwe.
7 Usa kutana bipa biyampe: Mwana-mulume mwine Hindu wa myaka 22 wafwenene kaka wadi usapula mu nsoko, walomba kifundwa kya Bible. Wamusapwila amba, myaka mwanda kunyuma, wāivwene myanda ya mu Bible mu mīsambo yādi isamba uno kaka na inandi. Wātengelwe na malondololo maluji aleta Bible pa makambakano ekoka nao bantu, ino inandi kāsepelelepo musapu, nandi wemona bu nkasampe bininge pa kulonda bubinebine bunka bwandi. Ino pano wasake kuyukila’ko myanda mikwabo mwanda ke mutame. Uno nsongwalume kaelelepo kitatyi nansha kimo. Wapwile kwifunda dibuku Buyuki mu mafuku 23 kete, myeji iná pa kupita’po, tamba paetene na kaka mu nsoko, walomba kubatyijibwa!
8 Tutu umo washilwile kifundwa na mwana-mulume mwine Hindu waetene nandi mu kudiye. Uno mukelenge wadi na makambakano mu busongi bwandi. Kadi wadi ukolejibwa na bunkolwankolwa. Ino waitabija uno Kamoni āye kumupempula ne kumusapwila madingi aleta Bible mu myanda ya kisaka. Bufundiji bwa Bible butala pa mwikadilo pa kumusangaja, waitabija kwifunda Bible. Ne aye, ne kisaka kyandi bashilula kutanwa ku kupwila. Mwenda mafuku nabo basapwila balunda nabo ne babutule babo bubinebine. Muya myaka, bantu basamba mu bano nabo baitabija bubinebine!
9 Leza usakilanga “bantu bonso kupanda, bafike ne pa kuyūkidija kwa binebine [kwa bubinebine].” (1 Tem. 2:4) Mu bano bantu mudi ne bana-balume ne bana-bakaji badi mu bipwilo kebitabijepo mudi Kidishitu, kifwa bwine Hindu. Shi mu mwaba wenu mudi bene Hindu, ubulwe’po kukebapempula panopano ponka, ukengidije madingi amoamo aletwa mu kino kishinte?