Kukokela Bininge Milangwe pa Bible!
1. Ku ngalwilo, Kiteba kya Mulami kyādi kilupwilwa bāni, ne i bāni bene bādi balupwilwa L’Âge d’Or ?
1 Nimelo imbajinji ya dipepala L’Âge d’Or yālupwilwe mu difuku dibajinji dya Kweji 10, 1919. Na bubine, dino dipepala dyāikele ke kingidilwa kya kamweno mu mwingilo wa busapudi. Mwanda waka? Mwanda dyālupwidilwe nakampata bantu bonso. Ino Kiteba kya Mulami akyo kekyādipo kilupwilwa bantu bonso, mwanda mu myaka mivule kyādi kimonwa’nka bu dipepala dya “kaluombe katyetye.” (Luka 12:32) Basapudi ba bulopwe bādi basangelanga mpata dino dipepala dipya, L’Âge d’Or, ne mu bula bwa myaka dyaabanibwe bininge kutabuka ne Kiteba kya Mulami kine.
2. L’Âge d’Or witwanga namani dyalelo, ne kitungo kyandi tamba ku ngalwilo i kitungo’ka?
2 Dipepala L’Âge d’Or dyādi dilupulwa mwanda wa kulombola bantu amba Umbikalo wa Myaka Kanunu wa Kidishitu o ukapwija makambakano abo, mwanda ukaleta myaka ya ntundubuko ku muzo wa muntu. Mu myaka makumi alondele’po, L’Âge d’Or wasendululwa mwa kukwashisha’ye mungya bisakibwa bya mwendela bitatyi. Mu 1937, dijina dyandi dyashinta ke Consolation. Mu 1946 waikala ke Réveillez-vous !, dino dyo dijina dyatelwa ne didi kūlu dino.
3. Réveillez-vous ! i mukwashe mpata mu kufikidila kwa bupolofeto’ka?
3 Tamba ku ngalwilo, dino dipepala i dikwashe mpata mu kuleta bukamoni bukatampe busapulwa tamba mu 1919. (Mat. 24:14) Inoko, pa kumona kupelakana kwa bitatyi byotudi’mo, bibalombe Réveillez-vous ! ekale kusendululwa monka.
4. (a) Le muntu ufwaninwe kulonga bika shi usaka kukafibwa mu “difuku dya bulobo bwa Yehova”? (b) Kukwatañana na Kusokwelwa 14:6, 7, yewa ‘mwikeulu wipapa umbukata mwa mūlu’ witanga bantu bonso balonge bika?
4 Midiyo ne midiyo ya bantu basangelanga kutanga Réveillez-vous ! mwanda wisambilanga pa myanda ya ntanda mivule mine mu muswelo utobala. Bine, bavule bene mu boba batanwanga ku Kivulukilo mwaka ne mwaka i batangi ba Réveillez-vous ! Inoko, shi muntu usaka kukafibwa mu “difuku dya bulobo bwa Yehova,” ufwaninwe kukwashibwa alonge bivule kupita’ko enka kutanga mabuku etu kete.—Zef. 2:3; Kus. 14:6, 7.
5. (a) Kushilwila mu Réveillez-vous ! wa Kweji 1, 2006, i bika bikesambilwa’po bininge? (b) Le kino kekikabulwepo kukunka bavule ku kulonga bika, ne kikafikidija bupolofeto’ka?
5 Pa kino, tamba mu Kweji 1, 2006, Réveillez-vous ! ukakokela bininge milangwe pa Bulopwe bwa Leza. Ukakankamika batangi pampikwa kafinda amba banyemene ku Bible shi basaka kupwija makambakano abo, ne ukakokela milangwe bininge pa bushintuludi buleta Bible pa binkumenkume bilongeka. Mu uno muswelo, batangi bakevwanija biyampe binkumenkume bilongeka ne kepabulwe bakakunkwa mutyima na byobatanga ne kwifunda myanda mivule itala padi Yehova.—Zek. 8:23.
6, 7. (a) Lelo Réveillez-vous ! ukakwasha namani bavule balonde binenwe mu 1 Tesalonika 2:13? (b) I misunsa inga ikekala ilupulwa Réveillez-vous ! ku kweji, ne ndimi mivule ikatengwa namani na kuno kushinta?
6 Réveillez-vous ! ukendelela kwisambila pa myanda isangaja bavule. Inoko, milangwe ikemanina nakampata pa Bible. (1 Tes. 2:13) Eyo, Kiteba kya Mulami byokisambilanga kala pa myanda ya mushike ya mu Bible, ne Réveillez-vous ! nandi byasa kwisambila pa myanda ya mu Bisonekwa, i kimweke patōka amba Réveillez-vous ! kakasakilwapo kulupulwa misunsa ibidi pa kweji. Pa kino, kushilula na nimelo ya Kweji 1, 2006, Réveillez-vous ! ukekala ulupulwa musunsa umo pa kweji. Kino kikapēleja mwingilo wa kuteakanya, wa kwalamuna, ne wa kutumwa kwa mabuku etu.
7 Kuno kushinta kukatenga ndimi kubwipi kwa 40 pa katwa ilupulwa’mo Réveillez-vous ! Mu ndimi mivule, Réveillez-vous ! utambanga kala dimo pa kweji nansha dimo mu myeji isatu. Ino Kiteba kya Mulami kekikashintapo, mhm.
8. Le basapudi bakekala bengidija Réveillez-vous ! pamo ne Kiteba kya Mulami namani?
8 Basapudi bakekala bapāna Réveillez-vous ! utamba dimo mu kweji pamo na nimelo yo-yonso ya Kiteba kya Mulami kya kweji’wa. Boba bapāna Réveillez-vous ! bakekala bengidija enka nimelo umo’wa mu bula bwa kweji yense pampikwa kushinta musapwilo wabo mu bukata bwa kweji na mulongelwa dyalelo.
9. I mwingilo’ka ukendelela kwingila Réveillez-vous !?
9 Tamba ku nimelo imbajinji ya dino dipepala mu 1919, dyādi ditelwa bu L’Âge d’Or, kupwa ke Consolation, ne pano ke Réveillez-vous ! dikyendelela kwingila mwingilo mukatampe mu busapudi. O mwanda tulomba amba Yehova endelele na kwesela kwabanibwa kwa dino dipepala mungya mupungilo wadyo musendululwe wa panopano ne amba dikwashe bantu bavule bene ba mu “mu mizo yonso, ne mu bisaka byonso ne mu bantu, ne mu ndimi” bavundamukile ku Bulopwe bwa Leza bu lo lukulupilo lwabo lumo kete.—Kus. 7:9.