Mukanda Utamba ku Kitango Kyendeji

ANNUAIRE 2014

Bengidi Netu Baswe:

Tudi na nsangaji mikatampe ya kwimulembela ku ngalwilo kwa uno mwaka wa pa bula. Ku mfulo kwa 2014, Yesu Kidishitu Mulopwe wetu, usa kubwanya myaka katwa tamba ubikala bu mulopwe mu bukata bwa balwana nandi.—Ñim. 110:1, 2.

Ku ngalwilo kwa uno mwaka wa mingilo, ku kubungakana kwa ku mwaka ku mwaka kwa Watch Tower Bible and Tract Society of Pennsylvania, Komite wa Bushintuludi bwa Bible bwa Ntanda Mipya walupwile Bible mushintululwe dipya mu Angele, muyampe kupita mashintuludi makwabo adi na bantu. Yehova waingidije bandi bana babutulwe ku mushipiditu basoneke Bushintuludi bwa Ntanda Mipya bubajinjibajinji. (Loma 8:15, 16) Mwene nobe witabije’mba, buno bubinga bumo bidi bulengeja buno bushintuludi bwikale bwa pa bula?

Mu bula mwa myaka mivule, Bilo ya Balembi ya Kitango Kyendeji i mitūle mwingilo wa bwalamuni bwa Bible pa kifuko kibajinji. Dyalelo dino, Bible mutuntulu nansha kipindi wa Bushintuludi bwa Ntanda Mipya udi pano mu ndimi 121. Twimukankamika kulombola Yehova amba musangedile Bible omudi nandi. Tangai’ye ne kulangulukila pa byanena difuku ne difuku. Shi mulonga namino, mukafwena kudi Yehova Leza, mwine ulembeje Bible.—Yak. 4:8.

Tutenekwanga bininge kitatyi kyotwivwana amba banabetu baswe balwa na bikoleja. Kyaba kimo bamonanga bu i bikomo mwa kusangela na banababo pamo. Kimfwa panopano ponka, mu Azia, kisaka kimo kyavutakanibwe bininge pakwetwe inabana na misongo ya bulebe enka na mu kukopa kwa diso. Bamuñanga bakatampe bakolelwe ne mwa kupwijija misongo yandi. Bine, i kya bulanda! Mulumyandi wadi umulama dyuba ne bufuku. Wabo mwana mwana-mulume ne bana bana-bakaji babidi i bashiye kimfwa kiyampe kya bwine Kidishitu na kukwatakanya bambutwile babo. Kino kisaka kiyampe, ne banwe bene kumo bakomena matompo palapala mudi na nsangaji ilupuka ku kūminina matompo a lwitabijo lwenu. (Yak. 1:2-4) Yehova ukulupijanga bashingwe māni bandi ne mikōko mikwabo amba tukekalanga na nsangaji shi tūminine matompo, mwanda tudi na dyese dya kukatambula būmi bwa nyeke!—Yak. 1:12.

Mwaka mupite, bantu batenwe ku Kivulukilo badi 19 241 252. Bine, kino kikankamika’po kashā pa kumona bantu batendela Yehova ne Yesu Kidishitu na kutanwa ku kuno kupwila kwa bulēme kutabuka kulongwa ku mwaka ku mwaka na bantu ba Leza! Kitatyi kya Kivulukilo, tubobo twa mitendelo twaelelwe na midiyo ya bantu baingile bu bapania mukwashi mu Kweji 3 ne Kweji 4. Kino i kya kutendelwa kashā! Mwene nenu mwasangele pa kuyuka amba boba bengila bu bapania mukwashi kitatyi kya bupempudi bwa mutadi wa kipindi nabo bakokeja kutanwa ku lenyo ya bapania yonso mituntulu nansha shi bupempudi kebudipo mu Kweji 3 nansha Kweji 4? Boba badi na tunangu twa bwine-leza i bevwanije mvubu ya kwingila nyeke mwingilo wa busapudi ne mingilo ya pa kipwilo. Kuvudilwa mingilo kwitukwasha tuninge ne kwimanija, ne kukomena manwa a Dyabola akimba kuzozeja lwitabijo lwetu ne kwitusasukija mu lwendo lwetu.—1 Ko. 15:58.

Bine, i kya nsangaji’po kashā pa kuyuka’mba mu mwaka wa mingilo wapityile’u, bantu 277 344 balombwele kwipāna kwabo na kubatyijibwa mu mema ne pano badi mu dishinda ditwala ku būmi pamo na banababo ba ntanda yonso! (Mat. 7:13, 14) Pa kusaka amba bano bapya “bemanije mu lwitabijo,” basakilwa bukwashi bwetu. (Kol. 2:7) Twendelelei kwikankamika umo ku mukwabo mwanda wa tūminine kufika’nka ne ku mfulo. (Mat. 24:13) “Mwisambei mu muswelo usenga boba banyoñame pa mityima, kwashai bazoze, tūkijijai bonso mutyima.” (1 Tes. 5:14) Shi ke pano, umo ne umo mu bukata bwetu, ‘alombele kitatyi kyonso’ amba: “Bulopwe bobe bwiye”—1 Tes. 5:17; Mat. 6:10.

Sangelai uno Annuaire ne kuyuka amba twimusenswe banwe bonso baswele Yehova!

Banabenu,

Kitango Kyendeji kya Batumoni ba Yehova