Le Amakedona Ikashilwila mu Isalela?—Le Bible Unena’po Namani?

Bible kalombolapo amba Amakedona i kavutakanya ka mu kifuko kimo, ino ulombola’mba i divita dya ntanda yonso dikalwa Leza na imbikalo ya bantu.

• “Myanda inenenwe ku mushipiditu na bandemona . . . yendanga ku balopwe ba ntanda yonso ikelwe na bantu, kwibakongakenya ku divita dya difuku dikatampe dya Leza Mwinē Bukomo Bonso. . . . Yebakongakenye pamo pa kifuko kitwa mu Kihebelu bu Amakedona.”—Kusokwelwa 16:14, 16.

Kishima “Amakedona” kitamba ku kishima kya Kihebelu Har Meghiddohn, kishintulula “Lūlu lwa Megiddo.” Megiddo kyādi i kibundi kya mu ntanda ya Isalela wa kala. O mwanda bantu bamo bakulupile amba Amakedona i divita dikalwibwa mu Isalela. Inoko, kifuko kya Megiddo nansha ntanda ya dya pa Bukata ne Kutunduka ke mikatampepo mubwanya kubwana “balopwe ba ntanda yonso ikelwe na bantu” ne balwana nabo.

Mukanda wa Kusokwelwa wālembelwe “mu biyukeno,” nansha mu muneneno wa kyelekejo. (Kusokwelwa 1:1) Amakedona keifunkilapo pa kifuko kampanda, ino ifunkila pa mwanda ukalongeka ntanda yonso, mwine mukebunga mizo yonso pamo mwanda wa kulwa na buludiki bwa Leza.—Kusokwelwa 19:11-16, 19-21.