“Noñanga Byonso Byombwanya Kulonga”

Irma ushikatanga mu Alemanye, udi na kintu kya myaka 90. Pa kupwa kulonga akishida misunsa ibidi ne kupasulwa mpasulo mikomo, kakibwanyangapo kusapula ku njibo ne njibo na mwaadi usapwila. Pano Irma usapwilanga bakwabo nkulupilo yandi, na kulembela babutule ne bantu baeyukile nabo mikanda. Mikanda ya Irma ikankamika ne isenga bafwilwe, itambulwanga senene na bantu, bene bavudile kumwita ne kumwipangula kitatyi kyakebatumina monka mikanda mikwabo. Irma unena’mba, “bino byonso binsangajanga ne kunkwasha ñendelele kusapula.”

Kadi Irma utuminanga banunu mikanda. Unena’mba, “lolo umo mununu waungityile ku telefone, waunombola’mba mukanda wami wamusengele bininge pafwile wandi mulume. Ulamine uno mukanda mu Bible kadi utañanga’o kyolwa kyonso. Mwana-mukaji mukwabo wafwidilwe mulume panopano wanenene amba mukanda wami wamukweshe bininge kupita busapudi bwa mumpe. Wadi na bipangujo bivule bya kulondolola, kadi waungipangwile shi ubwanya kwiya twimone nandi.”

Muntu ke kamonipo beyukile na Irma wavilukīle kulampe, wanenene Irma amutumine’ko mukanda. Irma unena’mba, “uno mwana-mukaji wadi ubikile mikanda yami yonso. Ino aye pa kufwa, wandi mwana mwana-mukaji waungita ku telefone. Wansapwila’mba watangile mikanda yonso yonadi ntumina inandi, kupwa waungipangula shi ngitabije kumutumina mikanda īsambila pa Bible.”

Irma usangedile bininge mwingilo wa busapudi. Unena’mba, “nombanga Yehova ampe nyeke bukomo bwa kumwingidila. Nansha byonkibwanyapo kusapula monka ku njibo ne njibo, noñanga byonso byombwanya kulonga.”