Shi udi na mwikadilo muyampe, ubwanya kushala mwimanije ku kivula kikatampe
KU BANKASAMPE
9 Bumuntu
MOBUSHINTULWILA
Bumuntu bobe kebufunkilangapo’nka pa dijina ne mumwekelo obe kete. Ino bufunkilanga ne pa mwikadilo obe, nkulupilo yobe, ne mwiendelejo obe. Bine, bumuntu bobe bukwatañene na kintu kyonso kilombola “byodi”—munda ne panja pene.
MWANDA WAKA KIDI NA MVUBU?
Shi uyukile mofwaninwe kwikadila, nabya ukalamata ku nkulupilo yobe pa kyaba kya kuleka bakwenu bakwendeje.
“Bantu bavule badi pamo bwa mapopi obavwikanga bisandi bya kupoteja mu mangajini. Ano mapopi keatoñengapo bisandi bya kuvwala; ino beavwikanga’byo.”—Adrian.
“Ndi mwifunde mwa kulameta ku byobya byoloke nansha ke pobimweka bu bikomo. Balunda bayampe bonkokeja kutonga i boba botulonda nabo misoñanya imo.”—Courtney.
MUSOÑANYA WA MU BIBLE: “Lekai kwiula ino ngikadilo ya bintu, ino alamukai na kushinta ñeni yenu.”—Loma 12:2.
BYA KULONGA
Langulukila pa bumuntu bodi nabo pano ne pa mosaka kwikadila na kubandaula mu bintu mokomene, bukōkekōke bobe, ne nkulupilo yobe. Muswelo muyampe wa kushilula i wa kulondolola ku bino bipangujo bilonda’ko.
Mokomene: Le ndi na bwino ne manwa a muswelo’ka? Le i mu bintu’ka monkomene? (Kimfwa: Le ndēmekele kitatyi? ndi na kwīfula? ñingilanga bininge? ndi na buntu?) Le i bintu’ka biyampe byonoñanga?
MADINGI: Le ukomenwanga kujingulula bintu biyampe bikutala? Shi i amo nankyo ipangula mbutwile nansha mulunda okulupile akulombole bintu biyampe byamonanga modi ne kyawibimwena nabya.
MUSOÑANYA WA MU BIBLE: “Muntu ne muntu abandaule bilongwa byandi, nabya ukekala na buluji bwa kusepelela pa mwanda wandi aye mwine, ke na kwidingakanyapo na muntu mukwabo, aa.”—Ngalatea 6:4.
Bukōkekōke: Lelo i ngikadila’ka ya mu bumuntu bwami yomfwaninwe kulumbulula? Le i kitatyi’ka kyonkomenwanga kulonga biyampe? I mu ngikadilo’ka momfwaninwe kutamija bininge kwīfula?
MUSOÑANYA WA MU BIBLE: “Shi tunene amba: ‘Ketudipo na bubi,’ nabya twiongolanga batwe bene.”—1 Yoano 1:8.
Nkulupilo: Le i misoñanya’ka ya mu mwikadilo yonondanga, ne mwanda waka? Le nkulupile mudi Leza? Le i bintu’ka binkulupije amba udi’ko? Le i bilongwa’ka byomona bu bya bukondame, ne mwanda waka? Le i bintu’ka bya kumeso byonkulupile?
MUSOÑANYA WA MU BIBLE: “Kusansanya kukakulama; kwivwanija kukakulela.”—Nkindi 2:11.