Kukōkela bambutwile bobe kudi pamo bwa kwaluja māpu a ku banki. Byobakuyukile bu muntu ukulupilwa po pene bakendelela na kukwapwija monka
KU BANKASAMPE
10 Kukulupilwa
MOKUSHINTULWILA
Bantu ba uno muswelo bakulupilwanga na bambutwile, balunda, ne na bakulu ba ku kaji. Balondanga bulombodi, bafikidija byobalaya, ne kwisamba bya bine.
MWANDA WAKA KIDI NA MVUBU?
Mu myanda mivule, bwanapabo bopebwa bukwatañene na muswelo obakukulupile mu bula bwa kitatyi kampanda.
“Muswelo muyampe wa kukulupilwa na bambutwile bobe i kwilombola’mba kodi mutame kadi uvuijanga biselwa byobe, ke enkapo podi nabo pamo ino i nansha podi kwa abe mwine pene.”—Sarahi.
MUSOÑANYA WA MU BIBLE: “Jingululai nyeke momwikadile banwe bene.”—2 Kodinda 13:5.
BYA KULONGA
Shi usaka wikale ukulupilwa nansha kwaluja kikulupiji kyadi kekijimine, ano matabula alonda’ko akokeja kukukwasha.
Ikala wampikwa budimbidimbi. I kutupu kintu kibwanya kulengeja bantu bajimije bukidi kikulupiji modi pamo bwa bubela. Na bubine, shi unena bya bine ne kwikala wampikwa budimbidimbi—kupityidila pa bilubo byobe—nabya bantu bakwabo bakakukulupila.
“Bipēlanga kwikala wampikwa budimbidimbi shi bintu byenda biyampe. Ino kwikala wampikwa budimbidimbi mu bintu bikumwekeja bibi ku bantu kukalengeja bantu bakwabo bakukulupile bininge.”—Caiman.
MUSOÑANYA WA MU BIBLE: Tusakanga “kwiendeja kwampikwa budimbidimbi mu byonso.”—Bahebelu 13:18.
Ikala ukulupilwa. Mu bwipangudi bumo bwalongelwe mu États-Unis, bantu 78 pa katwa badi na matyapu balombwele amba “kisakibwa kikatampe mpata pa kutweja muntu pa kaji i ekale ukulupilwa.” Kulonga bukomo bwa kwikala muntu ukulupilwa tamba pano kukakuletela byabuyabuya pokatama.
“Bami bambutwile i bajingulule amba kemvuijanga biselwa ne kwingila twaji twa pa lubanza pampikwa kwilaija’nka banombole. Poñendelela kulonga namino, po pene bambutwile benda bankulupila bininge.”—Sarah.
MUSOÑANYA WA MU BIBLE: “Ndyukile’tu amba abe usa kwitabija, . . . pa kuyuka’mba usa kulonga kupita ne bino byonanena’bi.”—Filemone 21.
Ikala na kitūkijetyima. Kwishila na kutama ku ngitu, kwine kumwekanga bukidibukidi ku bantu, divule pa kuyukwa na bantu amba ubatama mu ñeni ne mu malango, palombanga kitatyi.
“Ke kintupo’tu kimo kete kibwanya kulengeja bambutwile bobe ne bantu bakwabo bakukulupile. Inoko babwanya kutamija kino kikulupiji bityebitye shi wendelela na kuvuija biselwa mu bula bwa kitatyi kampanda.”—Brandon.
MUSOÑANYA WA MU BIBLE: “Vwalai . . . kitūkijetyima.”—Kolose 3:12.