Mwa Kulamina Lupeto
Bantu bavule i batyepeje’ko makambakano mu myanda ya lupeto na kwingidija misoñanya ya mu Bible.
PANGIKA BINTU SENENE
MUSOÑANYA WA MU BIBLE: “Mpango ya muntu wa kininga bine ikendeka, ino boba bonso ba kampeja-bukidi bine bakafula ku bulanda.”—Nkindi 21:5.
MOUSHINTULWILA: Pa kusaka’mba byendeke, i biyampe ulonde’nka bintu byopangikile. O mwanda pangika bintu senene kumeso kwa kulupula lupeto. Yuka’mba kusakilwapo padi kupota kintu kyonso kyosaka. Nanshi lupula lupeto na tunangu.
BYOBWANYA KULONGA:
Lupula’nka lupeto lopangikile. Lemba bintu byonso byosaka kulupwila lupeto kadi wibipangike mungya mvubu yabyo. Kupwa yuka lupeto losa kulupula ku kintu ne kintu. Shi ubalupula lupeto luvule ku kintu kimo, nabya sela lupeto lwadi lwa kulonga nalo kintu kikwabo ubweje’lo’ko. Kimfwa, shi ubalupula lupeto luvule lwa kupota esanshi, nabya sela lupeto lwadi lwa kulonga nalo bintu bya mvubu mityetye ubweje’lo’ko—kimfwa lwa kukadya ku leshitola.
Leka mapu a bituputupu. Shi bibwanika leka kwapula. Ino wilamije’ko lupeto lwa kupota bintu byosakilwa. Shi wingidijanga kalata ka ku banki, longa buninge bwa kufuta mapu onso ku mfulo kwa kweji ne kweji kutyina wakafuta’o na kamweno. Shi ubaapula, kwata’ko mulangwe wa kwaluja ndeni ne kulongela monka.
Bwifundi bumo bunena’mba, bantu bapota bintu na kalata ka banki, bekalanga na mutyima wa kulupula lupeto luvule. Nanshi shi udi na kalata ka banki ingidija’ko na tunangu.
LEKA MWIKADILA MUBI
MUSOÑANYA WA MU BIBLE: “Muzoze kadimangapo mu kitatyi kya mashika, o mwanda ukekala wa lulombo mu kitatyi kya mwangulo shi kadipo na kintu.”—Nkindi 20:4.
MOUSHINTULWILA: Buzoze bubwanya kuleta bulanda. O mwanda ingila na kininga, kadi shi bibwanika, lea’ko kalupeto kabwanya kukakukwasha mu mafuku a kumeso.
BYOBWANYA KULONGA:
Ingila bininge. Kwatakanya na makasa abidi mwingilo ukusokwela lupeto ne kwiwingila na kininga. Bakulu ba kaji basakanga bantu bengila na kininga.
Leka budimbidimbi. Kokeba mukulu obe wa kaji. Budimbidimbi bubwanya kukushingija kato ne kukulengeja ukomenwe kusokola kaji mwenda mafuku.
Leka makomwa-meso. Shi usaka’nka kwikala na lupeto luvulevule, nabya ukona bukomo bobe bwa ngitu, ne kipwano kyopwene na bakwenu. Vuluka’mba lupeto keludipo na mvubu kupita būmi.
MISOÑANYA MIKWABO YA MU BIBLE
Tanga Bible pa Entelenete, utūdilwe pa jw.org mu ndimi tutwa na tutwa
KOKEKALA NA KIBIDIJI KIBI KYA KUJIMIJA KITATYI NE LUPETO.
“Nkolwankolwa ne wa mudyopolo bakafula ku bulanda, kadi kukunuka kukavwika muntu bisasa.”—NKINDI 23:21.
LEKA KUZUMBIJA MUTYIMA BYA BITUPU.
“Lekai kuzumbija mityima pa mwanda wa būmi bwenu amba tukadya bika nansha’mba tukatoma bika, nansha pa mwanda wa imbidi yenu amba tukavwala bika.”—MATEO 6:25.
LEKA KWABILAABILA.
“Muntu wabilaabila upēlakananga mwanda wa bupeta pampikwa kuyuka’mba bulanda bukamupeta.”—NKINDI 28:22.