Le Kuvutakanibwa Ñeni I Bika?

Kuvutakanibwa ñeni i muswelo ulonga umbidi obe bintu mu ngikadilo mikomo. Bongolo bobe butumanga mema atelwa bu hormones mu umbidi obe onso. Ano mema alengejanga mutyima utwe bukidibukidi, mashi anange lubilolubilo, kuvudija nansha kutyepeja bukomo bwa mayumba, ne kūmija misunya. Kumeso kwa abe kujingulula bilongeka, umbidi obe walonga’po kala kintu. Shi bintu bivutakanya ñeni bibapu, umbidi obe “wealuja” kupwa waikala mowikadilanga.

KAMWENO KADI MU KUVUTAKANIBWA ÑENI NE BIBI BILUPUKA’KO

Kuvutakanibwa ñeni i muswelo wa kipangila wa kulonga bintu ubwanya kukukwasha ulwe na makambakano nansha na myanda ileta kyaka. Kuvutakanibwa ñeni kushilulanga mu bongolo bobe. Kamweno kadi mu kuvutakanibwa ñeni i mwanda kukukwashanga ulonge bintu bukidibukidi. Kadi kuvutakanibwa ñeni mu muswelo kampanda kubwanya kukukwasha ufikile pa bitungo byobe nansha kulonga bintu biyampe, padi mu ekizame, kwipangulwa pokimba kaji, nansha mu makayo.

Inoko kuvutakanibwa ñeni kwa endaenda, kupitepite nansha kwa nyeke kubwanya kukususula. Shi uvutakanibwa ñeni kyaba ne kyaba kadi kitatyi kyonso ubwanya kususuka ku ngitu, mu ñeni ne mu malango. Ngikadila yobe, kubadila’mo ne muswelo oikele na bakwenu bibwanya kushinta. Kuvutakanibwa ñeni kwa nyeke kubwanya ne kukulengeja utome bya kutoma ne kulonga bintu bikwabo bibi mwanda wa kwitalula’ko milangwe. Kubwanya’nka ne kulengeja muntu atyumukwe mutyima, apungile bininge, ne kwikala na milangwe ya kwiyoa.

Nansha bantu bonso byokebabwanyapo kuvutakanibwa ñeni mu muswelo umo, ino kubwanya kuleta misongo mikatampe. Kadi kubwanya kona kubwipi kwa umbidi onso.