Le Bya Busendwe Bidi Na Lupusa’ka pa Busongi Bobe?
Shi bya busendwe bingidijibwa biyampe, bibwanya kuningija kipwano kipwene ba mulume ne mukaji. Kimfwa bibwanya kukwasha ba mulume ne mukaji besambe mu bula bwa difuku.
Inoko bantu bamo besongele bengidijanga bya busendwe mu muswelo mubi, ne kino kibwanya . . .
kwibadīla kitatyi kya kushikatyila pamo.
kwibalengeja bengidile kwinjibo’nka ne pokebifwaninwepo.
kwibalengeja baleke kwikulupila ne kwilamata.
BYOFWANINWE KUYUKA
POMUDI PAMO
Mulume umo witwa bu Michael unena’mba: “Kyaba kimo pondi pamo na wami mukaji, bikalanga’tu wiya’mba kadi’popo. Aye utalanga’nka mu telefone yandi, ne kunena’mba, ‘nadi nkyatadile’mo.’” Mulume umo witwa bu Jonathan unena’mba, mu myanda ya uno muswelo “ba mulume ne mukaji babwanya kwikala mu kifuko kimo, inoko milangwe yabo kungi.”
LANGULUKA’PO: Le uvudile kwisamba ku telefone nansha kutuma misapu, kitatyi kyofwaninwe kwisamba na mwinē pobe?—BENE EFISESA 5:33.
MINGILO
Bantu bamo badi na twaji twibalomba’nka kwisamba ku telefone nansha kwilembela misapu ku olodinatele kyaba ne kyaba. Bakwabo nabo nansha twaji twabo byoketwibalombepo kulonga uno muswelo, ino bakengidilanga’to’nka ne ku njibo. Mulume umo witwa bu Lee witabija’mba, “kebipēlangapo kuleka kwitaba ku telefone nansha kutala musapu wa ku kaji mu kitatyi kyonetūdile’ko kya kupityija na wami mukaji.” Mukaji umo witwa bu Joy unena’mba: “Ñingidilanga ku njibo, o mwanda i bikomo kuyuka kitatyi kya kwimika mingilo. Pa kwikala na bujalale bilomba kulonga bukomo.”
LANGULUKA’PO: Lelo utejanga biyampe mwinē pobe kitatyi kyaesamba nobe?—LUKA 8:18.
KWILAMATA
Bantu bavule baipangwilwe banenene amba, kwingidija marezo a mīsambo bibi kuletanga ñuma mu kisaka. Bantu dikumi pa katwa baitabije amba batūdile pa Entelenete myanda yobadi bafile benē pabo.
Bantu bavule betabije amba marezo a mīsambo abwanya kwikala bu kyaka kikatampe ku “bantu besongele”, enka ne kulengeja bantu “balonge makoji.” Ke kya kutulumukapo shi bantu bemaninanga myanda ya dilubu mu kidye banena’mba, marezo a mīsambo alengejanga kutyumuka kuvule kwa masongi dyalelo.
LANGULUKA’PO: Lelo ufyanga mwinē pobe myanda yomwisamba na muntu wa ngitu ingi?—NKINDI 4:23.
BYOBWANYA KULONGA
YUKA BYA KUTANGIDIJA KUMESO
Muntu upela kudya kakekalapo na bukomo bwa ngitu buyampe. Muntu kapityijapo kitatyi pamo na mwinē pandi nandi, ukekala na makambakano mu busongi bwandi.—Bene Efisesa 5:28, 29.
MUSOÑANYA WA MU BIBLE: “[Jingululai] bintu bya mvubu mikatampe.”—BENE FIDIPAI 1:10.
Wisambile na mwinē pobe pa madingi omukengidija pa ano alonda’ko, nansha kulemba milangwe yenu ya mwa kwingidijija bya busendwe kutyina bya kaleta makambakano mu busongi bwenu.
Dīlai byakudya pamo difuku ne difuku
Mwitūdilei’ko kitatyi kya kuleka kwingidija bya busendwe
Mwitūdilei’ko difuku nansha kitatyi kya kulongela pamo kintu kisangaja
Shitai bingidilwa byenu bya busendwe, ne kwibitūla kufula pomulēle
Mwilamijei’ko minite 15 difuku ne difuku ya kwisamba, pampikwa kulabikwa na bingidilwa bya busendwe
Mwitungilei’ko nsá ya kufunga Entelenete