Le Bya Busendwe Bidi Na Lupusa’ka pa Milangwe Yobe?
Bantu befundanga kitatyi kyonso—ekale ku masomo, ku kaji, nansha pa bubinga bukwabo. Lelo bya busendwe bibwanya kwibakwasha? Pano kebipēla bininge kutanga myanda mivule abe papo ku njibo, ne kuteluka mu kityi kwine mpika.
Inoko bantu bavule bengidijanga bya busendwe bininge . . .
bapuakanibwanga kitatyi kyobatanga.
bakomenwanga kuta mutyima ku kintu kyobalonga.
bakōkanga bukidibukidi mu bitatyi byobadi bunka.
BYOFWANINWE KUYUKA
KUTANGA
Kyaba kimo bantu bengidijanga bingidilwa bya busendwe, kebekalangapo na kitūkijetyima kya kutanga kishinte kituntulu, ino batanga’tu bukidibukidi mwanda wa kuyuka milangwe mikatampe.
Kutanga myanda bukidibukidi i kuyampe shi ukimba kutana bukidibukidi malondololo a kipangujo. Inoko shi ukimba kwivwanija myanda’ya senene, uno ke muswelopo muyampe wa kutanga.
LANGULUKA’PO: Le udi na bukomo bwa kutanga bintu bivule? Le i muswelo’ka obwanya kwifunda biyampe shi utanga bintu senene?—NKINDI 18:15.
KUTA’KO MUTYIMA
Bantu bamo balañanga’mba bya busendwe bibapanga muswelo wa kulonga bintu bivule mwa kimo, kimfwa kwilembela na balunda koku kadi bafunda. Ino shi milangwe yabo keidipo pamo, i kutupu kyobabwanya kulonga’po biyampe, nakampata shi byonso bibidi bilomba kutebwa mutyima.
Pa kuta mutyima ku kintu bilomba kwidingila, inoko bilomba kulonga bukomo. Nkasampe umo witwa bu Grace unena’mba, “kukalongapo bilubo bivule kadi kukavutakanibwapo ñeni bininge. Nayukile amba i biyampe kuta mutyima ku kintu kimo ne kuleka kulabikwa na mingilo mivulevule.”
LANGULUKA’PO: Le bya busendwe bikulengejanga ukomenwe kuta mutyima ku kintu kimo, kadi ukomenwe kuvuluka bintu byowafundile?—NKINDI 17:24.
KWIKALA BUNKA
Bantu bamo kebasangelangapo kwikala bunka, o mwanda bengidijanga bya busendwe mwanda wa kwipwija mukose. Lolo umo witwa bu Olivia unena’mba, “kushikata’tu bitupu mu minite 15 pampikwa kutala mu telefone, tabulete, nansha kwakija TV kunkōkejanga.”
Inoko bitatyi byodi bunka udi na mukenga wa kulanguluka bininge—kintu kibwanya kukwasha bankasampe ne batame befunde.
LANGULUKA’PO: Lelo ulangulukanga mu bitatyi byodi bunka?—1 TEMOTE 4:15.
BYOBWANYA KULONGA
LANGULUKILA PA MUSWELO OINGIDIJA BYA BUSENDWE
Le i muswelo’ka obwanya kwingidija bya busendwe amba ulumbulule bwino bobe bwa kulanga? Le bya busendwe bibwanya namani kukulengeja ukomenwe kuta mutyima ku bintu ne kwifunda?
MUSOÑANYA WA MU BIBLE: “Lama tunangu twa kamweno ne bukomo bwa kulanga.”—NKINDI 3:21.