NTANDA IDI MU MADILO

3 | Kinga Kipwano Kyenu

MWANDA WAKA I KYA MVUBU

Pa mwanda wa makambakano avudila’ko mu ino ntanda, bantu bavule batunyanga kulama kipwano na bantu bobasenswe.

Bantu betolwelanga kulampe na bantu bobasenswe.
Boba besongele batunyanga kushikata biyampe na benē pabo.
Bambutwile baleka kuta mutyima ku makambakano a babo bana.

Byofwaninwe Kuyuka

Balunda badi na mvubu mwanda betukwashanga tulame bukomo buyampe bwa ngitu ne bwa mu malango, nakampata mu bitatyi bya makambakano.
Kuzumbija mutyima pa makambakano a mu ino ntanda, kubwanya kutūla būmi bwa kyenu kisaka pa ditompo mu miswelo yokemwadipo mulangila.
Mapya mabi abwanya kutenga bininge bana kupita ne momwibilangila.

Byobwanya Kulonga Pano

Bible unena’mba: “Mulunda wa bine ulombolanga buswe kitatyi kyonso kadi i mwanenu mubutulwe mwanda wa bitatyi bya tusua.”—Nkindi 17:17.

Langulukila pa muntu kampanda ubwanya kukukwasha ne kukupa madingi mayampe. Kuyuka’tu amba kudi muntu kampanda ukusenswe, kubwanya kukupa bukomo bwa kūminina mu bitatyi bya makambakano.

BYA KULONGA—Madingi a Kamweno

Mu bitatyi bya makambakano, kinga kipwano kyenu na kulonda ano madingi a kamweno

KOMEJA BUSONGI BWENU

Komeja busongi bwenu

Bible unena’mba: “Bantu babidi bapityile buya muntu umo . . . Mwanda shi umo wapone, mukwabo ubwanya kumulangula.” (Musapudi 4:9, 10) Boba besongele bafwaninwe kwingidila pamo, pa kyaba kya kwilwa abo bene na bene.

Kemwakilekai kuzumbija mutyima kwimulengeje muleke kwikala biyampe umo ku mukwabo. Kitūkijetyima ne kutyumwina mu manwi byendelanga pamo.
Mwisambilei nansha’tu musunsa umo ku yenga pa makambakano omubwanya kwikala nao. Tai mutyima ku kupwija mwanda—pa kyaba kya kwitopeka.
Mwitūdilei’ko kitatyi kya kulongela pamo bintu byomusenswe.
Vulukai bitatyi biyampe byokemudi bapityije pamo, kimfwa kutala mafoto a butundaile bwenu nansha myanda mikwabo isangaja.

“Ba mulume ne mukaji kebabwanyapo kwiivwana mu myanda yonso, inoko kino kekishintululapo amba kebabwanyapo kwingidila pamo. Ba mulume ne mukaji babwanya kukwata butyibi kya pamo, ne kwingidila pamo mwanda wa butyibi’bwa bwendeke.”—David.

LAMA KIPWANO KYENU

Lama kipwano kyenu

Kutentekela pa kutambula bukwashi bwa balunda, langulukila pa muswelo obwanya kukwasha bakwenu. Shi ukomeja bakwenu ukekomeja.
Ita balunda nobe difuku ne difuku uyuke mobabūkīle.
Ipangula balunda nobe muswelo obalwile na makambakano na owikonda nao.

“Kitatyi kyowikonda na byamalwa, balunda babwanya kukukwasha. Babwanya kukulombola bya kulonga, padi na kukuvuluja’tu bintu byoyukile kala. Balunda bakutele mutyima, kadi bayukile amba nobe wibatele mutyima.”—Nicole.

IKALA MBUTWILE UKWASHA

Ikala mbutwile ukwasha

Bible unena’mba: ‘Peja pa kwivwana, ija pa kwisamba.’ (Yakoba 1:19) Dibajinji, bobe bana babwanya kwikaka kulombola mobeivwanina ne makambakano obekonda nao. Inoko shi wibateje na kitūkijetyima, ukebakwasha balombole mobeivwanina.

Lengeja bobe bana bapēlelwe kulombola mobeivwanina. Bana bamo bapēlelwanga kwisamba pomwipwija mukose, kimfwa pomudi mu motoka nansha pomwinangija’ko lwa nshi, pa kyaba kya mushikete mwitala mpala na mpala.
Kwasha bobe bana baleke kulonda mapya mavule a myanda mibi.
Lombola bobe bana mpangiko yotūdile’ko mwanda wa kukinga kisaka.
Ikalai na mpangiko ya bya kulonga shi kubaikala myanda ya kibozo, kadi mwiibidijei’yo na benu bana.

“Wisambe na bobe bana ne kwibaleka balombole mobeivwanina. Babwanya kutunya kunena bintu bibakwatyije moyo, bibazumbija mutyima, nansha bibalobeja. Wibalombole amba nobe wikondanga na ino milangwe, kadi wibalombole bikukweshe wiikomene.”—Bethany.