NTANDA IDI MU MADILO

4 | Kinga Lukulupilo Lobe

MWANDA WAKA I KYA MVUBU

Kuzumbija mutyima pa makambakano a mu ino ntanda, kubwana kususula bantu ku ngitu ne mu malango. Bantu bavule ke batanwe na bimpengele, kebalañangapo amba ngikadilo yabo isa kushinta. Le baloñanga’po namani?

Bamo bapelanga enka ne kulangulukila pa bya kumeso.
Bakwabo nabo batomanga mālwa nansha bintu bikwabo bikolwañana mwanda wa kwitalula milangwe.
Bantu bakwabo batyetye nabo, bakimbanga’nka ne kufwa. Beipangula’mba: “Kyoñendelela kwikala’ko mūmi i kika?”

Byofwaninwe Kuyuka

Makambakano amo abwanya kukutana, i a mu kitatyi kityetye kadi abwanya kushinta bukidi bonka.
Nansha shi makambakano obe keashintyilepo, kudi bintu byobwanya kulonga bibwanya kukukwasha wiōminine.
Bible witupa lukulupilo lwa bine—amba bintu byonso bikambakanya muzo wa muntu bisa kutalulwa’ko lonso.

Byobwanya Kulonga Pano

Bible unena’mba: “Kemwakizumbijai mityima nansha dimo pa mwanda wa dya kesha, ke-pantu dya kesha dikekala na bya kuzumbijija mutyima byadyo. Difuku ne difuku didi na makambakano adyo mabwane.”—Mateo 6:34.

Kokekala na malangalanga pa mwanda wa dya kesha. Kokazumbija mutyima bininge pa bintu bya kumeso, utunye ne kulonga bintu byofwaninwe kulonga dyalelo.

Kusela mutyima kūlu pa bintu bibi bibwanya kulongeka, kukakubwejeja’ko enka kuzumbija mutyima ne kuzozeja lukulupilo lobe lwa būmi bulumbuluke bwa kumeso.

BYA KULONGA—Madingi a Kamweno

TÁ MUTYIMA KU BINTU BIYAMPE

Bible unena’mba: “Mafuku onso a kimonya-malwa i mabi, ino yewa wa mutyima muyule nsangaji udi nyeke mu masobo.” (Nkindi 15:15) Kuta mutyima bininge ku makambakano, kubwanya kukulengeja utunye kumona’mba kudi byobwanya kulonga mwanda wa kwiapwija. Inoko mumweno muyampe, ubwanya kukukwasha ulangulukile pa miswelo yobwanya kupwija makambakano obe.

Tyepeja kitatyi kyolonda mapya ne muswelo otele’ko mutyima.
Ku mfulo kwa difuku, langulukila pa bintu bibidi nansha bisatu byobwanya kufwijija’ko.
Lemba mulongo wa byobwanya kulonga, kadi pekale enka bintu byosaka kulonga mu difuku’dya. Abanya mingilo mikatampe mu mingilo mityemitye, amba ku mfulo kwa difuku umone byalupuka ku byowaloñanga.

ITABIJA BUKWASHI

Bible unena’mba: “Yewa ense witolwela . . . upelanga tunangu tonso twa kamweno.” (Nkindi 18:1) Kubwanyapo kulupuka mu kīna kilampe bunka bobe, inoko na bukwashi bwa bakwenu ubwanya kulupuka’mo.

Lomba bukwashi ku ba mu kisaka nansha ku balunda nobe.
Kadi kimba’ko miswelo yobwanya kwibakwasha’mo. Ikala na mumweno muyampe pa makambakano obe.
Shi ubajimija lukulupilo kadi kowiivwana’mba kwikala mūmi kekudipo na mvubu, enda ukamone muñanga. Kyaba kimo, kulēmenenwa bininge na milangwe i kilomboji kya misongo, pamo bwa kutyumukwa mutyima bininge. Bantu bavule bakwashibwe na kundapwa.a

a Langukai! kaletangapo bundapi kampanda.

Bible Witupa Lukulupilo lwa Bine

Kaimba wa mitōto wāsapwidile Leza mu milombelo amba: “Kinenwa kyobe i kinanu kya kulu kwami, ne kitōkeji kya mu kashinda kami.” (Ñimbo ya Mitōto 119:105) Tala mwikadile Bible—Kinenwa kya Leza—bu kitōkeji:

Mu bufuku bwa mfindi, kinanu kitukwashanga tumone i kwepi kwa kwenda. Ne mu Bible namo, mudi madingi a tunangu etukwasha potusaka kukwata butyibi bukomo.

Kitōkeji kibwanya kwitumunikila mu kashinda, twamona bidi kumeso. Ne Bible nandi ubwanya kwitukwasha twivwanije senene bitutengēle kumeso.

Bible i dibuku dikola, keditulombolangapo’tu enka mānga ya mwāshilwidile muzo wa muntu, ino ditupanga ne lukulupilo lwa bine lwa būmi bwa kumeso. Dilondololanga bino bipangujo:

Muswelo’ka?

Muswelo wāshilwile masusu: Bible unena’mba, bubi bwātwelele “mu ino ntanda kupityila ku muntu umo ne lufu kupityila ku bubi, mo mwasambakenine ne lufu ku bantu bonso mwanda bonso balongele bubi.”—Bene Loma 5:12.

Mwanda waka?

Mwanda buludiki bwa muntu i bukomenwe kupwija makambakano etu: Bible unena’mba, “muntu wenda kadipo na lupusa lwa kōlola ditabula dyandi.” (Yelemia 10:23) Bintu bilongeka mu ino ntanda bibingija uno mwanda.

Bika?

Bikalonga Leza mwanda wa kulongolola bintu: Bible ulombola’mba, “ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—Kusokwelwa 21:4.