Ba Mwana-Mulume ne Mwana-Mukaji Babajinji

I KWISHILA’KA kudi pa kino kifwatulo na kibadikile? Eyo, padi bantu. I ba mwana-mulume ne mwana-mukaji babajinji. Le i ani wēbapangile? I Leza. Lelo uyukile dijina dyandi? I Yehova. Bano ba mwana-mulume ne mwana-mukaji bāinikilwe bu ba Adama ne Eva.

Yehova Leza wāpangile Adama uno muswelo: Wāyete biloba bya panshi, wāpunga nabyo umbidi mubwaninine, umbidi wa mwana-mulume. Kupwa wapūja mu myulu yandi, Adama wāikala ke mūmi.

Yehova Leza wāpele Adama mwingilo. Wānene Adama enike banyema bonso beshileshile majina. Padi Adama wādi utala bidi nyema mu bula bwa kitatyi kilampe, mwa kumwinikila dijina diyampe. Adama paādi winika banyema, wājingulwile kintu kampanda. Lelo uyukile kyādi kintu’ka?

Banyema bonso bādi kilume ne kikaji. Kwādi banzovu balume ne banzovu bakaji, bantambo balume ne bantambo bakaji. Ino Adama kādipo na mukaji wandi. Penepo Yehova wālādika Adama mu tulo tukatampe twine, wāmuyata lupamvu lumo. Yehova wāpunga mwana-mukaji na luno lupamvu, wāikala ke mukaja Adama.

Adama wāsangele bininge kashā! Langa’po bidi nsangaji yādi na Eva pobāmutūdile mu budimi bulumbuluke namino! Pano bādi bafwaninwe kubutula bana ne kusepelela pamo.

Yehova wādi usaka ba Adama ne Eva bekale na būmi bwa nyeke. Wādi usaka baneñenye ntanda yonso ikale’nka bwa budimi bwa Edena. Bine ba Adama ne Eva bāsangele pobāivwene’mba bakengila uno mwingilo! Lelo nobe wādi wa kusangela uno mwingilo wa kulongolola ntanda ikale ke budimi bulumbuluke? Ino yō, nsangaji ya ba Adama ne Eva keyāijijepo. Tutalei mwanda waka.