Dilobe Kutūla ku Kunyongololwa mu Edipito

I enka bantu mwanda kete bāpandile ku Dilobe, inoko mwenda mafuku kibalwa kya bantu kyēlundile’ko, bāikala tununu ne tununu. Kupwa kwa myaka 352 kupwa kwa Dilobe, Abalahama wābutulwa. Tukamona mwāfikidije Leza mulao wandi na kupa Abalahama mwana mwana-mulume witwa bu Isake. Ebiya mu bana babidi ba Isake, Leza wātonga’mo Yakoba.

Yakoba wādi na kisaka kikatampe kya bana bana-balume 12 ne bana bana-bakaji. Bana 10 ba Yakoba bāshikilwe mwanabo nkasampe Yosefa, o mwanda bāmupoteje mu bupika mu Edipito. Mafuku pa kupita’po Yosefa wāikala ke muludiki mukatampe mu Edipito. Pāikele’ko kipupo kya nzala, Yosefa wātompa batutu wandi mwanda wa kuyuka shi abaalamuka pa mutyima. Kupwa, kisaka kya Yakoba, ko kunena’mba Bene Isalela, kyāvilukila mu Edipito. Byonso bino byālongekele myaka 290 kupwa kwa Abalahama kubutulwa.

Bene Isalela bāshikete mu Edipito mu bula bwa myaka 215 yālondele’po. Kupwa Yosefa wāfwa, bāikala ke bapika mu yoya ntanda’ya. Mwenda mafuku, Mosesa wābutulwa, kadi Leza wāmwingidija mwanda wa kunyongolola Bene Isalela mu Edipito. Mu kino KIPINDI 2 mudi mānga yālongekele umbula mwa myaka 857.