Dina Watanwa na Makambakano

UMWENE bano bakanangila Dina? Ukanangilanga bansongwakaji ba mu ntanda ya Kenani. Lelo shandi Yakoba ukasangela uno mwanda? Pa kulondolola kino kipangujo, tompa kuvuluka milangwe ya Abalahama ne Isake pa bana bana-bakaji ba mu Kenani.

Lelo Abalahama wāsakile wandi mwana Isake āsonge mwana-mukaji Mwine Kenani? Mhm, kāsakilepo. Lelo Isake ne Lebeka bāsenswe wabo mwana Yakoba kusonga nsongwakaji Mwine Kenani? Mhm, bāpelele. Le uyukile mwanda waka?

Mwanda bano Bene Kenani bādi batōta baleza ba bubela. Kebādipo bantu bayampe kwikala nabo bu balume nansha bu bakaji, nansha bu balunda ba pa mutyima. Nanshi tukokeja kwitabija’mba Yakoba kāloelelwepo wandi mwana mwana-mukaji kusamba bulunda na bano bansongwakaji Bene Kenani.

Bine, Dina wātenwe na makambakano. Lelo umwene uno mwana-mulume Mwine Kenani utala Dina pa kino kifwatulo? Dijina dyandi i Shekema. Difuku dimo Dina wāile kunanga, penepa Shekema wāmukwata ne kulāla nandi ku bukomo. Buno bwādi bubi, mwanda enka bana-balume ne bana-bakaji bēsonge bo bafwaninwe kulāla pamo. Buno bubi bwāmulongeje Shekema, bwāletēle Dina makambakano makatampe.

Banababo na Dina pa kwivwana uno mwanda, bākwatwa bulobo bininge. Shimioni ne Levi byobākwetwe bulobo bukatampe, bāyata bipete, bāenda mu kibundi, bākatamba bana-balume divita mu kitulumukila. Abo ne banababo bāipaya Shekema ne bana-balume bakwabo bonso. Yakoba wāloba pa mwanda wa kino kilongwa kibi kyālongele bandi bana.

Ino lelo ano makambakano onso āshilwile muswelo’ka? I pa mwanda Dina wāsambile bulunda na bantu bakubulwa kukōkela ku bijila bya Leza. Ketufwaninwepo kusamba bulunda na bantu ba uno muswelo, mwene i amo?