Mulopwe Mubi Wabikala pa Edipito

BANO bana-balume bengidijanga bantu mingilo ku bukomo. Tala yeu muntu ukupila mwingidi umo nsonde! Bengidi bano i ba ku kisaka kya Yakoba, betwa bu Bene Isalela. Ne bantu bebengidija ku bukomo i Bene Edipito. Bene Isalela pano ke bapika ba Bene Edipito. Le byāikele muswelo’ka?

Umbula bwa myaka mivule, kisaka kikatampe kya Yakoba kyāikele mu ndoe mu Edipito. Yosefa, mwine wādi muntu mulēme mu Edipito kupwa Felo, wēbalelele biyampe. Ino kupwa Yosefa wāfwa. Felo mupya, wādi ushikilwe Bene Isalela, wābikala pa Edipito.

Penepo uno Felo umbi wāmuna Bene Isalela bupika. Wābika batulāla pobadi, bantu ba kasusu ne bakalabale. Bāingidija Bene Isalela mingilo mikomo ya kūbaka bibundi bya Felo. Ino Bene Isalela po pene bavula. Kupwa Bene Edipito bākwatwa moyo amba Bene Isalela abavula bibi kadi badi na bukomo.

Lelo uyukile kyālongele Felo? Wālombola babimbutuja ba Bene Isalela’mba: ‘Mufwaninwe kwipaya bana bana-balume bonso babutulwa.’ Ino babimbutuja bādi bana-bakaji bayampe, kebāipailepo mwana nansha umo.

Penepo Felo wāsoñanya bantu bandi amba: ‘Ipayai bana balukeke bana-balume ba Bene Isalela. Lekai enka bana bana-bakaji.’ Mwene ino i mbila mibi mpata? Leka tumone mwāpandile mwana umo.