Kyana kya Ñombe kya Nsahabu

EE! I bika kadi bilonga bantu pano? Batōtanga kyana kya ñombe! I kika kyobalongela uno muswelo?

Mosesa pa kwija ku lūlu, bantu abanena’mba: ‘Ketuyukilepo kyafikila Mosesa i kika. Nanshi twilongelei leza wa kwitutangidila mu ino ntanda.’

Alone mwanabo na Mosesa wanena’mba: ‘I biyampe. Vulai nzenze yenu ya nsahabu mundetelei’yo.’ Bantu pa kumuletela’yo, Alone wasungulula nzenze’ya ne kupunga kyana kya ñombe. Penepo bantu kebanena’mba: ‘Mwine uno’u ye Leza wetu wetulupwile mu Edipito!’ Kupwa Bene Isalela abasoba masobo makatampe, ne kutōta kyana kya ñombe.

Yehova pa kumona kino, wakalabala. Penepo wanena Mosesa’mba: ‘Tūka bukidi. Bantu abalonga bibi kashā. Abailwa bijila byami kebafukamina kyana kya ñombe kya nsahabu.’

Ebiya Mosesa wapulumuka lubilo ku lūlu. Pa kufwena kubwipi, tala byamona’bi. Bantu bemba koku baja kufulakufula kwa kyana kya ñombe kya nsahabu! Mosesa wakalabala ne kwela panshi bipapo bibidi bya mabwe bisonekelwe’po bijila, nabyo bibaladika tubesetubese. Penepa wayata kyana kya ñombe wekisungulula. Kupwa wapondakanya’kyo ke bukula.

Bantu abalonga kintu kibi kashā. Penepo Mosesa wasoñanya bana-balume umbukata mwabo bakwate bipete byabo. Mosesa wanena’mba: ‘Bantu babi batōta kyana kya ñombe bepaibwe.’ Kupwa bana-balume abaipaya bantu 3 000! Mwene kino kilombola’mba tufwaninwe kuta mutyima ku kutōta Yehova kete kuleka’ko baleza bakwabo ba bubela?