Kipema kya Butōtyi

LELO uyukile kyoki kyobōbakile’ki? I kipema kya pa bula kya kutōtela’mo Yehova. Bekitanga ne bu tabenakulo. Bantu bāpwile kwikyubaka mwaka umo kupwa kutamba mu Edipito. Lelo uyukile wāletele mulangwe wa kwikyubaka?

I Yehova. Pādi Mosesa ku Lūlu lwa Shinai, Yehova wāmulaije muswelo wa kwikyubaka. Wāmulombwele ekilonge mu muswelo upēla kukonkola ne kusela. Namino bādi bakokeja kusela bibese, kwenda nabyo pa kifuko kikwabo ne kwibikwika monka. O mwanda pādi patunduluka Bene Isalela muntanda mutuputupu, bādi benda baselele kipema.

Shi utale munda mwa kyumba kityetye ku mfulo kwa kipema, usa kumona’ko sanduku nansha kitenge. Kitwanga bu dikumbo dya kipwano. Dyādi na bamwikeulu babidi nansha bakelubi ba nsahabu ku mfulo na mfulo. Kadi Leza wāsonekele Mbila Dikumi pa bipapo bikwabo bibidi bya mabwe, mwanda bibajinji byāladilwe na Mosesa. Ano mabwe ādi abikilwe mu dikumbo dya kipwano. Kadi, bātūdile’mo ne mutyibi wa mana. Mana i bika, shi ukivulukile?

Yehova wātongele Alone, mwanabo na Mosesa, ekale kitobo mukatampe. Wāludikile bantu batōte Yehova. Bandi bana nabo bādi babitobo.

Pano tala kyumba kikatampe kya kino kipema. I kikatampe kutabuka kyumba kityetye misunsa ibidi. Lelo ubamone kasanduku nansha kitenge kityetye, ne mwishi mutyemutye ulupuka’mo? Ano ye madabahu pādi pasokela babitobo ensense. Kupwa mudi ne kibikwa binanu kya binanu bisamba-bibidi. Kintu kya busatu kya mu kino kyumba i meza. Pādi patūlwa mikate 12.

Mu kipango kya tabenakulo mwādi lweso nansha nsāni wa kyoilo muyule mema. Babitobo ye bādi boila’mo. Mwādi kadi ne madabahu makatampe. Ādi asokelwa’po banyema bādi balambulwa Yehova. Kipema kyādi kitūlwa umbukata mwa kitūlo, kadi Bene Isalela bādi bekijokoloka koku na koku.