Mukombo wa Alone Ubamena Maluba

TALA maluba ne bipa byele mobishipukile ku uno mukombo. I mukombo wa Alone. Maluba ne bipa byele’bi bibashipuka ku mukombo wa Alone mu bufuku bumo kete! Tutalei bidi kine kyobyashipukila.

Bene Isalela bakilumbakana mu ntanda mutuputupu kufika ne pano. Bantu bamobamo kebakisakilepo Mosesa ekale mwendeji nansha Alone mwine kwikala kitobo mukatampe. Ye milangwe idi nayo Kola, Datani, Abilama ne bamfumu 250 ba bantu. Abo bonso abaiya kebanena Mosesa’mba: ‘Mwanda waka wi mwizunzule ku meso etu?’

Mosesa walombola Kola ne balondi bandi amba: ‘Yatai bininga bya mudilo kesha lubanga, mutūle’mo ne ensense. Kupwa mwiyei ku tabenakulo ya Yehova. Ye potukayuka i ani ukatongwa na Yehova.’

Mu dya kesha, Kola ne balondi bandi 250 abaiya ku tabenakulo. Bantu bavule bakwabo abaiya mwanda wa kwibakankamika. Yehova papo wakalabala. Mosesa wanena’mba: ‘Sonsolokai ku mapema a bano bantu babi. Kemwakitengai kintu kyabo nansha kimo.’ Bantu abakōkela ne kusonsoloka ku mapema a ba Kola, Datani ne Abilama.

Kupwa Mosesa wanena’mba: ‘Ku kino kilongwa ye komukayukila utongelwe na Yehova. Nshi ikapūtuka ne kumina bano bantu babi.’

Mosesa ukala’tu kishima, nshi ibapūtuka. Dipema dya Kola ne bintu byandi, ne Datani ne Abilama ne bobadi nabo abakulukila’mo, kupwa nshi ibebapūta. Bantu pa kwivwana kudila kwa boba baminwa na nshi, abaela mabila’mba: ‘Nyemai! Nshi yaketumina ne batwe bene!’

Ino Kola ne bantu 250 baadi nabo bakimene papo kubwipi na tabenakulo. Ebiya Yehova watume mudilo ubebaloteja abo bonso. Kupwa Yehova walombola Eleaza mwanā Alone ayate bininga bya mudilo bya bafwa’ba, ebipunge bu mputo ipēla ya ku madabahu. Ino mputo ya madabahu yadi bu kidyumu ku Bene Isalela bayuke’mba i kutupu muntu mukwabo, kutalula’mo Alone ne bandi bana, wadi ufwaninwe kwingila bu kitobo kudi Yehova.

Ino Yehova wasake kulombola patōka’mba i mutonge Alone ne bandi bana kwikala babitobo. Penepo wanena Mosesa’mba: ‘Sapwila mfumu wa kisaka ne kisaka asele mukombo wandi. Ku kisaka kya Levi, i Alone okasapwila kusela mukombo wandi. Penepo ukatūla mukombo ne mukombo mu tabenakulo kumeso kwa dikumbo dya kipwano. Mukombo wa muntu ontongele ukamena maluba.’

Ino lubanga lukwabo, Mosesa’mba aye atale’mo, mukombo wa Alone au na maluba ne bipa byele kasha bikamena’ko! Mwene pano ubayuka mwanda waka Yehova wameneje maluba ku mukombo wa Alone?