Bana-Bakaji Babidi Bakankamane

BENE Isalela pa kumweshibwa malwa, pano kebadidila Yehova. Yehova webalondolola na kwibapa bendeji bankanka ba kwibakwasha. Bible utelanga bano bendeji bu batyibi. Yoshua ye wadi mutyibi umbajinji, batyibi bakwabo bamupingakenine i ba Oteniele, Ehuda ne Shamale. Ino umbukata mwa bantu bakweshe Isalela, babidi i bana-bakaji, ba Debola ne Yaile.

Debola i mupolofeto-mukaji. Yehova umulombolanga myanda ya mafuku a kumeso, kupwa nandi kasapwila bantu binena Yehova. Kadi Debola i mutyibi. Ushikete munshi mwa kankindu mu ntanda ya ngulu, kadi bantu bāyanga kwadi mwanda wa ebakwashe na myanda yabo.

Mu kino kitatyi Yabine i mulopwe wa Kenani. Udi na makalo a bulwi 900. Kibumbo kyandi kya basola i kikomo bininge, kibafikija ne Bene Isalela bavule ku kwikala bengidi ba Yabine. Mudyavita wa kibumbo kya bulwi kya Yabine i Shisela.

Difuku dimo Debola watumanya Mutyibi Balaka, kamunena’mba: ‘Yehova wanena’mba: “Yata bana-balume 10 000 wende nabo ku kalūlu ka Tabola. Nkalundwila Shisela kodi. Nkamupāna mu makasa obe, aye ne kibumbo kyandi kumo.”’

Balaka walombola Debola’mba: ‘Nkenda shi nobe ukende nami pamo.’ Debola waenda, ino wanena Balaka’mba: ‘Kukatumbilapo buno bushindañani, mwanda Yehova ukapāna Shisela mu kuboko kwa mwana-mukaji.’ Kadi ye mobyaikadila.

Balaka watūkila ku kalūlu ka Tabola mwanda wa kwisambakana na basola ba Shisela. Ponka’po Yehova waleta dilobe dya mema, ne basola bavule balwana abalobela. Ino Shisela watentuka pa dikalo dyandi wanyema.

Na pano ponka Shisela wafika ku kipema kya Yaile. Yaile wamutundaila ne kumupa majiba. Kino kyamukunukija, ponka’po waponena mu tulo tukatampe. Penepo Yaile wayata kikomo kya kipema, wapopa’kyo mu mutwe wa uno muntu mubi. Kupwa, Balaka pa kwiya, Yaile wamulombola lufu lwa Shisela! Pano ubamone’mba byanene Debola bibafikidila.

Ku mfulo, Mulopwe Yabine nandi waipaibwa, Bene Isalela abashikata bidi mu ndoe umbula bwa kitatyi kampanda.