Yezebele—Mulopwe-Mukaji Umbi

MULOPWE Yeloboame pa kufwa, balopwe bonso babikala mu bulopwe bwa bisaka 10 bya kungala bya Isalela i babi. Inoko wibatabukile kubipa i mulopwe Ahaba. Uyukile i mwanda waka? Mwanda Yezebele wandi mukaji i mubi bininge.

Yezebele ke Mwine Isalelapo. I mwanā mulopwe wa Zidone. Utōtanga Bala, leza wa bubela, kadi wafikija Ahaba ne Bene Isalela bavule ku kutōta Bala. Yezebele ushikilwe Yehova kadi wakubija bapolofeto bandi bavule. Bakwabo abakafyama mu mita, kutyina kwipaibwa. Shi Yezebele asake kintu kampanda, ukokeja kwipaya ne muntu mwanda’tu wa ayate’kyo.

Difuku dimo Mulopwe Ahaba wadi mwiumbile. Ebiya Yezebele wamwipangula’mba: ‘Mwanda waka wi mwiumbile dyalelo?’

Ahaba wamulondolola’mba: ‘I mwanda wa byaunena Nabote. Nadi nsaka kupota budimi bwandi bwa mañanza. Ino waunena’mba nkipoteja’bopo.’

Yezebele wanena’mba: ‘Kokikambakana, nsa kukuyatyila’bo.’

Ebiya Yezebele watume mikanda kudi bamfumu ba ku kibundi kushikatanga Nabote. Webanena’mba: ‘Nenai bantu balembakane banene’mba Nabote wafinge Leza ne mulopwe. Kupwa mulupwile Nabote panja pa kibundi, mumwase mabwe afwe.’

Yezebele pa kwivwana’mba Nabote wafu, wanena Ahaba’mba: ‘Enda ukayate budimi bwandi bwa mañanza.’ Mwene ubamone amba Yezebele ufwaninwe kupebwa mfuto pa mwanda wa kino kilongwa kibi kyaalonga?

Kitatyi kimo, Yehova watume Yehu amupe mfuto. Yezebele pa kwivwana’mba Yehu yao wiya, wepenta meso ne kuvwala biyampe mwanda wa kwineñenya. Yehu pa kufika watana Yezebele pa dididisha, waite bana-balume ba mu njibo ya mulopwe’mba: ‘Mwelei panshi!’ Bantu’ba abakōkela, enka na momwenine pa kifwatulo’pa. Abamwela panshi wafwididila. Ino yo mfulo ya Yezebele mulopwe-mukaji umbi.