Yesu Ufundija ku Lūlu

TALA Yesu ushikete kuno. Ufundijanga bano bantu bonso ku lūlu mu Ngadilea. Badi kubwipi nandi’ba, i bandi bana ba bwanga. I mutonge’mo bantu 12 bekale batumibwa. Batumibwa i bana ba bwanga ba Yesu ba pa bula. Le uyukile majina abo?

Kudi Shimona Petelo ne mwanabo Andele. Kupwa ke Yakoba ne Yoano, nabo i bana na bana. Mutumibwa mukwabo witwanga bu Yakoba, kadi kudi mukwabo witwa bu Shimona. Batumibwa babidi betwanga bu Yudasa. Umo i Yudasa Isakadiota, ne Yudasa mukwabo witwanga bu Fadeusa. Kupwa ke Fidipa ne Natanela (witwa ne bu Batolomyu), ne Mateo ne Tomase.

Pa kupwa kujoka ku Samadia, Yesu wāshilwile kusapula musunsa umbajinji amba: ‘Bulopwe bwa mūlu bubafwena.’ Lelo uyukile buno bulopwe? I umbikalo wa bine wa Leza. Yesu ye mulopwe wao. Ukaludikilanga mūlu ne kuleta ndoe pano pa ntanda. Ntanda yonso ikālamunwanga bu paladisa milumbuluke na bulopwe bwa Leza.

Pano Yesu ufundijanga bantu buno bulopwe. Wibashintulwila’mba: ‘Tala momukalombela. Tata wetu udi mūlu, dijina dyobe dilēmekwe. Bulopwe bobe bwiye. Kiswa-mutyima kyobe kilongeke pa ntanda’nka mokilongelwa mūlu.’ Bantu bavule beitanga bu ‘Milombelo ya Mfumwetu.’ Bakwabo beita bu disambila dya ‘Tata Wetu.’ Lelo ukokeja kunena ino milombelo yonso?

Kadi Yesu ufundijanga bantu mobafwaninwe kwikadila abo bene na bene. Wanena’mba: ‘Longela bakwabo byosaka bakulongele.’ Lelo kwikalangapo usepelela shi bakwabo abakulongela biyampe? Penepo tulongelei bakwetu biyampe, ye mwitusoñenya Yesu. Mwene bikekala bilumbuluke pakekala bantu bonso balonga biyampe mu paladisa pano pa ntanda?