Yesu Waiya bwa Mulopwe

KITATYI kityetye kupwa kukomeja bampofu babidi ba lulombo, Yesu waiya ku kakibundi kadi kubwipi na Yelusalema. Wanena bana ba bwanga babidi’mba: ‘Endai mu kibundi, mukatana’mo mpunda mwana. Mumukutulule mundetele’ye.’

Abo pa kumupaila’ye, Yesu wakanda’po. Kaenda pepi ponka mu Yelusalema. Aye pa kufwena ku kibundi, kibumbo kikatampe kya bantu kibaiya kumusambakana. Bavule abavūla mitwelo yabo kebeyala mwishinda. Bakwabo abatyumuna malala ku mikoma. Nabo abala’o mwishinda, kebela lubila’mba: ‘Leza esela mulopwe waiya mu dijina dya Yehova!’

Pa kala mu Isalela, balopwe bapya bādi batwela mu Yelusalema bakende pa mpunda mwana mwanda wa kwilombola ku bantu. Ye akyo kyalonga Yesu. Bano bantu abalombola’mba basakanga Yesu ekale mulopwe wabo. Inoko ke bantu bonsopo bamusaka. Tusa kwikimona pa kuyuka byafikila Yesu paenda ku tempelo.

Yesu wakomeja bampofu ne ba bulema mu tempelo. Banuke pa kumona bino, abaimbe mitendelo kudi Yesu. Pa kino, babitobo abalobe, kebanena Yesu amba: ‘Wivwene binena banuke’bi?’

Yesu walondolola’mba: ‘Nebivwene. Lelo kemwatangilepo mu Bible’mba: “Leza ukatambija mitendelo mu byakanwa bya twanuke?”’ Penepo banuke abatumbija mulopwe ubikikilwe na Leza.

Tusakanga kwikala bwa tuno twanuke, mwene i amo? Bantu bamo bakokeja kwitupeleja kusapula bulopwe bwa Leza. Ino tukendelela na kusapwila bantu bintu bya kutendelwa bikalongelwa bantu na Yesu.

Kitatyi kya Yesu kya kubikala bu mulopwe kyādi kekyabwene pākidi pano pa ntanda. Ino kikekala kitatyi’ka? Bana ba bwanga ba Yesu basakanga kwikiyuka. Tukekitanga mu mānga ilonda’ko.