Mu Njibo Mishitwe

BA PETELO ne Yoano pa kupwa kutaluka ku kibundu kya Yesu, Madia washala’ko bunka. Penepo kadila. Kupwa wabandama katale mu kibundu, enka motwamwenine pa kifwatulo kyotwapwile’ki. Wamone’mo bamwikeulu babidi! Abamwipangula’mba: ‘Le kyodidila i kika?’

Madia walondolola’mba: ‘Abasela Mfumwetu, nkiyukilepo kobamutūla i kwepi.’ Penepo Madia waalamuka ne kumona mwana-mulume. Wamwipangula’mba: ‘Le okimba i ani?’

Madia walanga’mba i mwinē budimi, kadi’mba padi ye uselele umbidi wa Yesu. Penepo wanena’mba: ‘Shi i abe umuselele, nombole kowamutūla.’ Nanshi muntu’wa ye Yesu. Pano Yesu ke muvwale ngitu ingi, Madia wakomenwa kumujiula. Ino pa kumwita pa dijina dyandi, Madia wayuka’mba i Yesu. Wanyema kukalombola bana ba bwanga’mba: ‘Namone Mfumwetu!’

Kupwa, dyonka difuku’dyo, bana ba bwanga babidi badi benda ku kibundi kya Emese, amba batale muntu kaenda nabo. Papo bulanda bwa lufu lwa Yesu i bwibakwate. Ino abo benda, muntu’wa webashintulwila bintu bivule bya mu Bible bibasangaja. Ku mfulo, bana ba bwanga pa kwimana mwanda wa kudya, abayuka’mba i Yesu. Kupwa Yesu wajimina, bano bana ba bwanga babidi abajoka bukidi kukasapwila batumibwa mu Yelusalema.

Ponka’po, Yesu wakamwekela Petelo nandi. Bakwabo abasangala pa kwivwana uno mwanda. Kupwa bana ba bwanga babidi’ba abatana batumibwa mu Yelusalema. Abebalombola mwebamwekela Yesu mwishinda. Abo bakinena ino myanda, uyukile kintu kitulumukwa kyamweka?

Tala pa kifwatulo. Akyo kibelo kishite, Yesu webamwekela’nka mu njibo’mwa. Bana ba bwanga abasangala byamwiko! Mwene dino i difuku dya nsangaji? Lelo ukokeja kubala misunsa yemwekeja Yesu kudi balondi bandi? Le ubabala’mba ke itano?

Pamweka Yesu, mutumibwa Tomase kadipo’po. Penepo bana ba bwanga abamulombola’mba: ‘Twadi tubamone Mfumwetu!’ Tomase wanena’mba, poso mone bidi Yesu, penepa kengitabija. Bine, mafuku mwanda kupita’po, batumibwa abebunge mu njibo mishitwe, papo ne Tomase monka. Ponka’po, Yesu webamwekela’nka mu njibo’mwa. Ye kwanza Tomase waitabija.