Yesu Wajokela Mūlu

MAFUKU pa kupita’po, Yesu welombola misunsa mivule kudi balondi bandi. Difuku dimo kubwipi kwa bana ba bwanga 500 abamumone. Uyukile byebalombola Yesu pa kwibamwekela? I bulopwe bwa Leza. Yehova watumine Yesu pano pa ntanda mwanda wa kufundija myanda ya Bulopwe. O mwanda ukifundija’bo ne pa kupwa kusanguka pene.

Lelo ukivulukile bulopwe bwa Leza i kika? Eyo, Bulopwe i umbikalo wa bine wa Leza momwa mūlu, Yesu ye Muntu utongelwe na Leza bu mulopwe. Enka na motwāfundile kala, Yesu wēlombwele amba ukekala mulopwe wa kutendelwa na kudisha banzala, kubelula babela ne kusangula bafwe!

Ebiya pakabikala Yesu bulopwe momwa mūlu mu bula bwa myaka kanunu, lelo ntanda ikekalanga namani? Eyo, ntanda yonso ikekalanga ke paladisa milumbuluke. Mavita, butapani, misongo ne lufu lwine kebikekala’kopo. Twikitabije mwanda Leza wālongele ntanda ikale bu paladisa ya kusangaja bantu. O mwanda wālongele budimi bwa Edena ku ngalwilo. Yesu nandi ukalongela monso musakila Leza.

Kitatyi kya Yesu kujokela mūlu, kibabwana. Welombola kudi bandi bana ba bwanga mafuku 40 matuntulu. Pano abaitabija’mba i mūmi monka. Ino kumeso kwa kwibashiya, webanena’mba: ‘Shalai mu Yelusalema kufika ne pomukatambula mushipiditu sandu.’ Mushipiditu sandu i bukomo bwa Leza bwingila, pamo bwa luvula lupukuma, ukakwasha balondi bandi balonge kiswa-mutyima kya Leza. Ku mfulo Yesu wanena’mba: ‘Mukasapula mwanda wami kufika’nka ne ku mfulo kwa ntanda.’

Yesu upwa’tu kunena kino, kubalupuka kintu kya kutendelwa. Washilula kukanda mūlu, enka momwena’mu. Kupwa dikumbi dibamujike, bana ba bwanga kebakimumonepo. Yesu waenda mūlu ne kwanjididila kubikala balondi bandi badi pano pa ntanda.