Mfulo ya Bibi Byonso

UBAMONE bika pano? Eyo, i basola bakandile pa bampunda batōka. Pano tala kobatamba. Bampunda batūkanga mūlu pa makumbi! Lelo mūlu mudi bampunda ba bine?

Mhm, bano ke bampundapo ba bine. Tuyukile uno muswelo mwanda bampunda kebabwanyapo kwenda pa makumbi, mwene i amo? Ino Bible wisambilanga pa bampunda badi mūlu. Uyukile i mwanda waka?

Mwanda kitatyi kimo bampunda bāingidijibwe mu malwi mavule. Nanshi Bible unenenanga pa bantu batamba mūlu koku bakandile pa bampunda mwanda wa kulombola’mba Leza usa kulwa na bantu ba pano pa ntanda. Uyukile dijina dya pa kifuko pakalwilwa dino divita? I Amakedona. Dino divita dikatalulanga bibi byonso pano pa ntanda.

Yesu ye ukatangidila dino divita dya Amakedona. Vuluka, Yesu ye utongelwe na Yehova bu mulopwe wa umbikalo Wandi. O mwanda Yesu uvwele kilongo kya bulopwe. Kadi kipete kishintulula’mba ukepayanga balwana na Leza bonso. Lelo tukokeja kutulumuka pa kuyuka’mba Leza ukepaya bantu babi bonso?

Jokela bidi ku Mānga ya 10. Ubamone’po bika? Bine, i Dilobe dikatampe dyāipaile bantu babi. Wāletele dino Dilobe i ani? I Yehova Leza. Pano tala pa Mānga ya 15. I bika bilongeka’po? I kusokwa kwa Sodoma ne Ngomola na mudilo wātumine Yehova.

Pūtula pa Mānga ya 33. Tala byafikila bampunda ne makalo a divita a Bene Edipito. Wālengeje mema āye ebapūte i ani? I Yehova. Wālongele namino mwanda wa kukinga bantu bandi. Tala pa Mānga ya 36 ne 76. Ubamone’mba Yehova wālekele ne bantu bandi Bene Isalela bonakanibwe mwanda wa bibi byobālongele.

Nanshi ketukokejapo kutulumuka pa kuyuka’mba Yehova ukatumanga basola bandi ba momwa mūlu mwanda wa kwiya kupwija bibi byobalongele pano pa ntanda. Ino, langa’po bidi mobikekadila! Pūtula paje tutale.