Kupangwapangwa Pamwanda wa Boloke
Pamo kodi mwivwane balunda nobe nansha banabenu banena’mba ba Tumoni twa Yehova abapi myanda, nansha amba abapelejibwa na baludiki, nansha kadi amba i bantu babi. Mwanda waka banenenwanga bibi uno muswelo?
Ke pamwandapo wa kunena’mba ba Tumoni kebalemekelepo bijila, ino i pamwanda abo balondanga mu lwayo lwa Yesu. Yesu wāsapwidile bandi bana-babwanga’mba mukatopekwanga, kupangwapangwa, ne kubepelwa myanda mibi-mibi na bantu. Buluji i buno: walwana na Leza umbajinji, Satana, leza wa pano panshi, ye aye usenswe kubombola bantu baleke kwingidila Leza.—Mateo 5:10-12; 10:16-22, 34-39; 24:9, 10; Yoano 15:17–16:3; 2 Temote 3:12; 1 Petelo 5:8; Kusokwelwa 12:17.
Pākwetwe batumibwa, bāelwa mu kidye, ke pamwandapo wa kunena’mba bādi banonga-bibi, bañonaona, nansha bamombojani, mhm. I pamwanda wa kusapula myanda miyampe. Pālombele mutumibwa Polo amba myanda yandi itumwe mu kidye kikatampe, wādi usaka kukenenena ne kukashintulula mungya bijila bubinga budi na bakristu bwa kusapula myanda miyampe.—Bilongwa 4:18-20; 5:28-32; Fidipai 1:7.
Dyalelo ba Tumoni twa Yehova i bakristu balemekele bijila, basonkanga musonko ne kulēmeka balupusa. Balubulanga bya Kesala kudi Kesala, bya Leza nabyo kudi Leza. Shi kebomvwañenepo na baludiki kampanda, nankyo yuka’mba balupusa kebasenswepo kwitabija mwingilo wa busapudi, nansha kadi padi i pamwanda wa kubulwa kwikuja kwabo mu myanda ya ntanda. Ino mu bino byonso, ba Tumoni twa Yehova bafwaninwe kwikala na mwimanino wa muswelo umo na owa wādi na batumibwa bānene amba: “Batwe tufwaninwe kukokela Leza, kutabuka kukokela bantu.”—Bilongwa 5:29, MB; Mako 12:17; Yoano 18:36; Tetusa 3:1, 2.
Ba Tumoni twa Yehova kebakimbengapo kupangwapangwa, ino basakanga kushikata kukanwa talala, pakubulwa myanda. Ino, shi bashilule kwibapangapanga pamwanda wa kikōkeji kyabo ku bijila bya Leza ne pamwanda wa kulonda kimfwa kya Yesu Kristu, bekyūmininanga na nsangaji.—Mateo 5:10-12; Bilongwa 5:40, 41; 1 Kodinda 4:12; 1 Temote 2:2; 1 Petelo 3:14, 15; 4:12-16.
• Mwanda waka ba Tumoni twa Yehova banenenwa bibi ne kupangwapangwa?
• Mwanda waka ba Tumoni twa Yehova bekalanga babulwa kumvwañana kitatyi kimo-kimo na balupusa, na mokyāfikile bakristu batumibwa?
• Bengidi ba Yehova bamonanga kupangwapangwa namani?
[Kapango pa paje 29]
Yesu wātwelwe kwa Pilato ne mutumibwa Polo nandi wākutwa mu kifungo pamwanda wa busapudi bwa Bulopwe bwa Leza