Shapita 4

Waimita Ino Aye Kasongelwe

MADIA kadi na dimi dya myeji isatu. Vuluka amba, walēle makweji mabajinji a dimi dyandi kwa Edisabeta, ino pano ke mujokele kwabo ku Nazala. Panopano ponka, ba mu kyabo kibundi bonso basa kuyuka amba waimita. Bine, mutyima umuzumbazumba bininge!

Kintu kyakomeja mwanda nakampata i kino, Madia i bamukwatyile kudi Yosefa sendwe wa mbao usa kumusonga. Kadi uyukile amba ku bene Isalela, mungya bijila bya Leza, shi mwana-mukaji mukwatyilwe na mwana-mulume alonge busekese ku kusaka na mwana-mulume ungi, ufwaninwe kwashibwa mabwe. Lelo usa kushintulwila Yosefa namani mwaimityile dino dyandi dimi?

Madia waendele kasha wenda, walāla’ko makweji asatu, Yosefa kuno utengele kumumona. Pano abetana, Madia wamusabila uno mwanda. Kekubulwe padi ulonga bukomo bwa kumushintulwila amba dimi dyaimite i dya ku bukomo bwa mushipiditu sandu wa Leza. Ino, enka na momukokeja kwibifwatakenya, uno mwanda i mukomo kwitabija kudi Yosefa.

Yosefa uyukile amba Madia i mwana-mukaji wanibwa. Kadi i kimweke patōka amba umusenswe bininge. Ino bintu byonso bishintulula Madia, bipita’tu bweleyombo, bimweka’nka bu dino dimi i ditambe kudi mwana-mulume kampanda. Inoko, Yosefa kasakepo kumwashija mabwe afwe, nansha kumufwija bumvu ku meso a bantu. Pano ulanga kumulubula umbufyafya. Mu mine myaka’yo, bantu bekwatyile badi bamonwanga pamo’nka bwa besonge, shi abepele, kyadi kilomba dilubu dituntulu.

Yosefa washala ulanguluka pa uno mwanda, waenda kukalāla. Mwikeulu wa Yehova wamumwekela mu kilotwa kamusapwila’mba: “Kokikwatwa moyo pa kutundaila mukajobe, Madia, mhm, ke-kintu kyokya kyaimite aye i kya [m]ushipiditu [s]andu. Ebiyampe ukabutulanga mwana, mwana-mulume, ino ukamwinika dya bu-Yesu, mwanda aye ukapandijanga bantu bandi ku mambo abo.”

Yosefa pa kulanguka, wafwija’ko bikatampe! Kepejijepo, walongela monka mumusapwidile mwikeulu. Waselela Madia ku yandi njibo. Kino kilongwa kyalongwa ku meso a bantu bonso bo butundaile bwine bulombola amba ba Yosefa ne Madia pano abesongelela. Ino Yosefa kasambakenangapo pamo na Madia mu bula bwa kino kitatyi kyonso kyadi na dimi dya Yesu.

Talai! Dimi dya Madia pano ke ndulundulu, ke mbutwila pi, Yosefa wamutenteka pa mpunda. Lelo benda kwepi, ne mwanda waka abakute luno lwendo aku Madia kadi kubwipi na kubutula? Luka 1:39-41, 56; Mateo 1:18-25; Kupituluka 22:23, 24.

▪ Yosefa waivwana ku mutyima namani pa kuyuka amba Madia udi na dimi, ne mwanda waka?

▪ I muswelo’ka ukokeja Yosefa kulubula Madia aku badi kebesongele?

▪ I kilongwa’ka kilongelwe ku meso a bantu bonso kilombola amba ba Yosefa ne Madia pano abesonge?