Shapita 5

Kubutulwa kwa Yesu—Kwepi ne Kitatyi’ka?

KESALA AKUTUSA, mulopwe wa Loma, waeleja lubila amba, muntu ne muntu ajokele mu kibundi mobāmubutwidile mwanda wa kukelembeja. O mwanda Yosefa wakute lwendo kaenda ku Betelema, ku kibundi kobāmubutwidile.

Bantu bavule i batūtyikile mu Betelema, baile kwilembeja, ba Yosefa ne Madia kebamwenepo kwa kufikila, abakashikata mu kipombo. Amo muno, mulamwanga bampunda ne banyema bakwabo, mo mwabutwilwa Yesu. Madia wamuvungila mu bisandi, kupwa wamulādika mu kidīlo, mutūlwanga bidibwa bya banyema.

Bine, Kesala Akutusa i muludikwe na Leza pa kweleja luno lubila lwa amba, muntu ne muntu akelembeje kwabo. Kino kyo kyalengeja Yesu akabutwilwe mu Betelema, kibundi kyēsambilwe’po mu Bisonekwa mafuku mavule kunyuma, amba mo mukabutwilwa mulopwe wālailwe.

Buno i bufuku bwa mvubu mikatampe kashāa! Bakumbi bongwidile kibumbo panja mu madimi, abamone kitōkeji kibelele umbukata. I ntumbo ya Yehova! Mwikeulu wa Yehova webasapwila’mba: “Kemukikwatwa moyo, mhm, ke-ne-muntu talapo byonemuletela myanda-miyampe ya kusepelela kukata, nayo īkēkalanga ya bantu bonso. Ke-pantu dyalelo dino’di kubemubutwilwa mu kibundi kya Davida Mupandiji, ke Kidishitu Mfumwetu kadi. Kadi kiyūkeno kyenu kyo kino: Mukatāna kāna kavungilwe mu kisandi, kalēle mu kidilo kya bañombe.” Kadi amba batale, bamwikeulu bakwabo bavule abebamwekela, bemba amba: “Leza atumbijibwe ntumbo mūlu mwine, ne pano panshi ndoe, ya ku mutamba wa bantu [ba kusaka kuyampe, NW].”

Bamwikeulu pa kujoka, bakumbi abashala kebesapwila abo bene na bene amba: “Twendeko ku Betelema tukamone kino’ki kyafika, ne byetuyūkija’kyo Yehova.” Abaenda bukidibukidi bonka, abatana Yesu mu kifuko mwadi mwibalombwele bamwikeulu amba mo momukamutana. Bakumbi pa kufumika myanda yadi ibasapwidile mwikeulu, bantu bonso bevwana abaana. Madia wakwata bino binenwa byonso, webilama mu mutyima wandi.

Bantu bavule dyalelo bakulupile amba Yesu wābutwilwe mu mafuku 25 a kweji wadikumi-nabubidi. Ino kweji wadikumi-nabubidi i kitatyi kya mvula ne mashika makomo mu Betelema. Bakumbi kebādipo bakokeja kushikilwa panja bufuku mu madimi na luombe lwabo mu kyakyo kitatyi kya mwaka. Kadi, Kesala mwine Loma wādi uyukile amba bantu bādi bakanina kumutombokela, kādipo ukokeja kunena bantu bakute lwendo mu buyo nkala nkala lwa kwenda kukelembeja. I kimweke patōka amba Yesu wābutwilwe mu mulanga. Luka 2:1-20; Mika 5:2.

▪ Mwanda waka ba Yosefa ne Madia benda ku Betelema?

▪ I myanda’ka itulumukwa yalongeka mu bufuku bubutwilwe Yesu?

▪ Tubayuka namani amba Yesu kābutwilwepo mu mafuku 25 a kweji wadikumi-nabubidi?