Shapita 13

Tuboilei Ñeni pa Matompo a Yesu

YESU upwa’tu kubatyijibwa, watwalwa mu ntanda mutuputupu ya Yudea na mushipiditu wa Leza. Udi na bintu bivule bya kulanguluka’po, mwanda pa kubatyijibwa kwandi, “diulu dya[di diba]jikuka,” amba ajingulule bintu bya mūlu. Kyabine, i bintu bivule byafwaninwe kulanguluka’po!

Yesu waije’mo mafuku 40, mwinya ne bufuku pampikwa kudya kakintu nansha kamo mu kino kitatyi. Papo Yesu waivwana nzala mpata, Dyabola wamufwena kamutompa, amba: “Shi udi Mwana Leza unene ao mabwe ālamuke ke mikate.” Ino Yesu i muyuke amba ke biyampepo kwingidija bukomo bwa kulonga bingelengele mwanda wa kamweno ka aye mwine. Pa kino, wapele kutompibwa.

Ino Dyabola kamulekelepo. Watompa muswelo mukwabo. Wasapwila Yesu elekelele apone panshi kutamba pa musaka wa tempelo, amba bamwikeulu ba Leza bamukūle. Ino Yesu ketabijepo kulonga kino kilongwa kya kwilombola ku bantu. Yesu watenga myanda idi mu Bisonekwa, wamulombola amba i bibi kutompa Leza uno muswelo.

Pa ditompo dyabusatu, Dyabola ulombola Yesu malopwe onso a pano pantanda mu kingelengele, koku umunena’mba: “Shi umfukamina kuntōta nankyo byobya byonso nkakupa’byo.” Ino Yesu wapele dikwabo kunekenyibwa na matompo a kulonga bibi, watonge kwikala nyeke na kikōkeji kudi Leza.

Tukokeja kuboila ñeni pa ano matompo atompwa Yesu. Kifwa, alombola amba Dyabola ke mwikadilapo mubi, pamo na mulangila bantu bamobamo, aye i muntu binebine, ino kamwekapo. Matompo a Yesu alombola monka amba imbikalo yonso ya pano pantanda i bupeta bwa Dyabola. Lelo Dyabola wadi ukokeja kutūla Kidishitu pa ditompo dyabine namani, shi yadi amba ke yandipo?

Langa’po bidi: Dyabola wanena amba usaka kupala Yesu mpalo pa mwanda wa kilongwa kimo kete kya butōtyi, penepa amupe malopwe onso a ntanda. I bine, Dyabola ukokeja kwitutompa mu uno muswelo umo onka, pakwabo na kwitupa mikenga ya kusokola bintu bikatakata bya ino ntanda, shi byabupeta, shi lupusa, shi kitenta kampanda. Wivwane tulonde kifwa kya Yesu, na kulama kikōkeji kyetu kudi Leza mu matompo o-onso, shi a muswelo’ka, shi a muswelo’ka, nankyo tubaikala batunangu! Mateo 3:16; 4:1-11; Mako 1:12, 13; Luka 4:1-13.

▪ Mobimwekela, i bintu’ka bilanguluka’po Yesu mu bula bwa mafuku 40 adi mu ntanda mutuputupu?

▪ Le Dyabola watompa kongola Yesu muswelo’ka?

▪ Lelo i ñeni’ka yotukokeja kuboila pa matompo a Yesu?