Shapita 17

Ufundija Nikodema

PANO Yesu udi ku Pashika wa mu mwaka wa 30 K.K., ulonga biyukeno ne bingelengele bikatampe. Ebiya, bantu bavule abamwitabija. Nikodema, umo wa mu Sanhedrini, kidye kikatampe kya Bayuda, watendela, pano usaka kuyukila’ko bivule. Penepo wakanangila Yesu mu bufuku bwa fukutu, kepabulwe padi utyina amba shi amonwe na bakulumpe bakwabo ba Bayuda, ntumbo yandi yakapēlulwa.

“Abe Mufundiji!,” ye aye unena, “tubayūka nanshi abewa udi mufundiji utambile kwa Leza, ke-muntu kekudipo nansha umo uyūkile kulonga biyūkeno pamo na byōlonga abe’bi, poso Leza udi nandi.” Yesu walondolola Nikodema amba, muntu pa kutwela mu Bulopwe bwa Leza, ufwaninwe ‘kubutulwa dikwabo.’

Lelo muntu ukokeja kubutulwa dikwabo muswelo’ka? ‘Lelo muntu ukokeja kadi kujokela munda mwa inandi akabutulwe musunsa wabubidi?’ ye Nikodema wipangula.

Kebikokejikapo, kuno kubutulwa dikwabo kekushintululapo namino. Yesu washintulula’mba: “Shi muntu kabutwilwepo ku mema ne ku mushipiditu, nabya kakatwelapo mu bulopwe bwa Leza.” Pabatyijibwe Yesu ne mushipiditu sandu wamutūkila, po apo paabutwilwe “ku mema ne ku mushipiditu.” Paelele Leza lubila tamba momwa mūlu amba: “Uno i wami mwana wakuswedibwa o ntōkelwe pa mutyima,” waidile kalombo amba nabutula mwana wa kumushipiditu utengele kutwela mu Bulopwe bwa mūlu. Mafuku pa kupita’po, mu dya Pentekosa mu mwaka wa 33 K.K., bantu bakwabo babatyijibwe abatambula mushipiditu sandu, ebiya nabo ababutulwa dikwabo ke bana ba Leza ba kumushipiditu.

Ino mwingilo wa uno muntu, mwana wa pa bula wa Leza, i wa mvubu mikatampe. Yesu wasapwila Nikodema amba: “Monka mwāimikile Mosesa nyoka muntanda mutuputupu, poso ne Mwanā muntu akēmikwe’nka nabya, amba bonso bakwitabija mudi aye kebakonekapo, mhm, poso batambule bidi būmi bwa kulādila monka nyeke ne nyeke.” Eyo, monka mokyādi kisakila boba bene Isalela bāsuminwe na banyoka ba bulembe kutala ku nyoka wa mukuba ebiya bamone kupanda, ne bantu bonso nabo mo monka, pa kusaka amba bapande ku ngikadilo yabo ya lufu, bafwaninwe kulombola lwitabijo lwabo mudi Yesu Mwanā Leza.

Yesu pa kulombola buswe bwa Yehova mu uno mwanda, wasapwila Nikodema kadi amba: “Leza wāswele ntanda mpata, o mwanda wāpēne wandi Mwana wa bunka, amba muntu yense ulombola lwitabijo mudi aye kakonakanibwapo, ehe, ino ukekala na būmi bwanyeke.” (NW) Papo muno mu Yelusalema, makweji asamba bitupu kupwa kwa Yesu kushilula mwingilo wandi, walombola patōka amba i aye wingidijibwa na Yehova Leza mwanda wa kupandija muzo wa muntu.

Yesu waendelela na kushintulwila Nikodema myanda mikwabo amba: “Mwanda Leza kātuminepo wandi Mwana mu ntanda kwimukija ntanda, mhm, ino [wāmutumine] mwanda wa ntanda ipandijibwe kupityila kudi aye,” (NW) ko kunena’mba ke pa mwandapo wa kuponeja ino ntanda nansha kwiitopeka, na kutyibila muzo wa muntu nsambu ya lufu, ehe. Ino Yesu wātuminwe “mwanda wa ntanda ipandijibwe kupityila kudi aye,” pamo’nka na mwanenena aye mwine.

Nikodema waiya kudi Yesu na moyo mukatampe mu fukutu wa bufuku fututu. Nanshi i kyendele’mo pafudije Yesu mīsambo yabo na kumusapwila’mba: “O mwanda wa kuponena uno, amba mwinya [walombwele Yesu mu būmi ne mu bufundiji bwandi ubaiya mu ino ntanda], nanshi bantu basensweko fukutu—ku mwinya mpika—mwanda mīngilo yabo yadi imbi. Ke-bantu bonso bakulonga bibibibi bashikilwe mwinya, nansha kufwena ku mwinya mpika, mwanda wa kutyina’mba mingilo yabo yakasokoka. Ino yewa kadi ulonga byabinebine aye wiya konka ku mwinya’mba mīngilo yandi īmwekelele yālongelwe mudi Leza.” Yoano 2:23–3:21; Mateo 3:16, 17; Bilongwa 2:1-4; Umbadilo 21:9.

▪ I kika kyatonona Nikodema akanangile Yesu, ne mwanda waka waiya bufuku?

▪ ‘Kubutulwa dikwabo’ kishintulula kika?

▪ Yesu walombola muswelo’ka mwingilo wandi utala pa bukūdi bwetu?

▪ Kunena amba Yesu kailepo kwimukija ntanda kishintulula namani?