Shapita 18

Yoano Wenda Utūka, Yesu Wenda Ukanda

YESU ne bandi bana-babwanga abatambe mu Yelusalema mobaendele ku Pashika wa ku muketeko wa mvula wa mwaka wa 30 K.K. Inoko kebajokelapo kwabo ku Ngadilea, benda kukabatyijañana mu ntanda ya Yudea. Yoano Mubatyiji wingilanga uno mwingilo umo onka tamba kubwipi kwa mwaka mutuntulu, nandi ukidi na bana-babwanga belungile kwadi.

Kunena na bubine, Yesu mwine kabatyijañanapo, i bandi bana-babwanga bo abo babatyijañana na lupusa lwandi. Lubatyijo lobabatyijañana ludi na nshintulwilo imo yonka na lubatyijañana Yoano, i kyelekejo kya kwalamuka pa mutyima kwa Bayuda, mwanda i bajilule kipwano kya pa Bijila bya Leza. Inoko, kupwa kwa lusangukilo lwa Yesu, ukasoñanya bandi bana-babwanga kubatyija lubatyijo ludi na nshintulwilo ingi. Dyalelo, lubatyijo lwa bene Kidishitu i kyelekejo kya kwipāna kwa muntu mwanda wa kwingidila Yehova Leza.

Inoko, kuno ku ngalwilo kwa mwingilo wabo, ba Yesu ne Yoano, nansha byobengila pala pala, abo bonso bafundija ne kubatyija bantu bālamuka pa mutyima. Ino bana-babwanga ba Yoano abaivwanina Yesu mukao, kebeuninga kudi Yoano amba: “Abe Mufundiji . . . talapo byākabatyija ne bantu bonso bamupwila.”

Ino Yoano pa kyaba kya kwivwana mukao, aye wasangela kwendelela kumeso kwa mingilo ya Yesu, kadi usaka ne bandi bana-babwanga nabo basangale. Webavuluja’mba: “Bānwe bonso umbangitabija byo nanene’mba: Nkidipo aye Kidishitu, mhm. Nanshi nadi wakutumwa kumeso kwandi.” Kupwa webape’po kyelekejo kiyampe, amba: “Yewa udi ne musongwa nabya i musoñañani, ino mukwabo na musoñañani wakwimana padi umwivwana, usepelelanga pakatampe, mwanda wa diwi dya musoñañani; i yenka namino nami tusepo twami tubafika.”

Yoano byadi mulunda na Musoñañani, wasangele paafikije bandi bana-babwanga kudi Yesu, pano ke papite kubwipi kwa myeji isamba. Bamobamo umbukata mwabo basa kwikala ba mu kabumbo ka musongwa wa Kidishitu wa momwa mūlu, kabundilwe na bene Kidishitu bashingwe māni a mushipiditu. Yoano usakila ne bandi bana-babwanga bakidi pamo nandi balonde Yesu, mwanda kitungo kyandi i kya kulongolwela mwingilo wa Kidishitu dishinda amba upite biyampe shē. Mo mwikishintulwila Yoano Mubatyiji amba: ‘Aye yao ufwaninwe kukanda, ino ami mfwaninwe kutūka.’

Yoano, mwana-wabwanga mupya wa Yesu, wadi dibajinji mwana-wabwanga wa Yoano Mubatyiji, i musoneke pa mwanda utala nsulo kutambile Yesu ne pa mvubu ya mwingilo Wandi wa kukūla bantu, amba: “Yewa utambile mūlu ukidile bonso, . . . Aye Shandi umusenswe Mwana, ne bintu byonso wa mutambika’byo mu kuboko kwandi. Ino wakwitabija mudi Mwana nabya udi ne būmi bwa kulādila monka nyeke ne nyeke, nanshi yewa wakubulwa kwitabija nankyo kakamonepo būmi, mhm, ino kukalabala kwa Leza kudi nandi pādi, kumutengele.”

Kinondanonda na panene Yoano Mubatyiji amba mwingilo wandi wenda utūka, abamukwata kudi Mulopwe Heloda. Heloda i muyate Helodyasa, mukaja mwanabo Fidipa, ke wandi, Yoano pa kusabila bilongwa byandi bu byakubulwa kwendela’mo ku meso a bantu bonso, Heloda wamweleja mu kifungo. Yesu pa kwivwana lupupuji amba abakute Yoano, watalukididila mu Yudea pamo ne bandi bana-babwanga, abaenda mu Ngadilea. Yoano 3:22–4:3; Bilongwa 19:4; Mateo 28:19; 2 Kodinda 11:2; Mako 1:14; 6:17-20.

▪ Luno lubatyijo lobabatyijañana na lupusa lwa Yesu kumeso kwa lusangukilo lwandi ludi na nshintulwilo’ka? Papo lwa kupwa kwa kusanguka kwandi nalo?

▪ Yoano walombola muswelo’ka amba miuningo ya bandi bana-babwanga i yampikwa kwendela’mo?

▪ Mwanda waka Yoano waelwa mu kifungo?