Shapita 31

Bapulula Miseke mu dya Sabado

KEPEJIJEPO, Yesu ne bandi bana-babwanga abataluka ku Yelusalema kebajokela ku Ngadilea. Ke ku muketeko wa mvula, impumbu ya miseke iyesela ku mikombo mu madimi monso tōo. Bana-babwanga abaivwana nzala. Ebiya abapulula impumbu ya miseke kebenda badya. Ino byodidi dya Sabado, kamwene na kamwene kabakasapula.

Bendeji ba bipwilo basakile kwipaya Yesu mu Yelusalema amba ujilulanga dya Sabado. Pano Bafadiseo abaiya kebamutopeka. Amba: “Talanga bidi, bāna-bobe-babwanga byo ke balonga kyakujidikwa muno mu dya Sabado dino.”

Bafadiseo bafwatakanya’mba kupulula miseke ne kuvinga’yo na makasa mwa kudīla’yo, bidi pamo bwa kwangula ne kupūla’yo. Uno mumweno wa kaninga-mpo obamona mingilo uwalengeja dya Sabado ke kitundu kilēma, pa kyaba kya kwikala’dyo bu kitatyi kya nsangaji ne kya kwiubaka kumushipiditu. Papo Yesu webapatanya na kwibapa bifwa bya mu Bible bilombola’mba mpango ya Yehova Leza ke ya kulondapo na kaninga-mpo kijila Kyandi kya dya Sabado.

Yesu wanena’mba, pāivwene Davida ne bantu bandi nzala, bātwelele mu tabenakulo ya Leza, bādya mikate milombolwe. Mine mikate’ya yādi kala ke mitalulwe ku meso a Yehova, ke bapingakenye’po kala ne mipya, kadi nakampata yādi ibīkilwa babitobo, bo abo bādi badya’yo. Ino Davida ne bantu bandi pobādile’yo, pa mwanda wa nzala yebakwete, kebātopekelwepo.

Yesu webape kifwa kikwabo, amba: ‘Le kemwatangilepo monka mu Mukanda wa bijila amba mu masabado, babitobo bengilanga mu tempelo kebamonangapo dya sabado bu dikola, ino abo ne kupya mambo mpika?’ Eyo, nansha ke mu dya Sabado, babitobo bepayanga banyema ne kwingila mingilo mikwabo mu tempelo ya kuteakanya bitapwa bya banyema! ‘Ino nemusapwila,’ ye Yesu unena, ‘Pano pantu padi kintu kikatampe kupita tempelo.’

Yesu wadyumuna Bafadiseo amba: “Shi mwadi muyūkile mwendele uno mwanda’mba: Nsaka wakufwila lusa, ke wakuleta kyonka kitapwa, ehe, longa nankyo kemwibaponejangapo bampikwa mambo.” Ku mfulo wafudija’mba: ‘Mwanda Mwanā muntu ye aye Mfumwandya dya sabado.’ Lelo Yesu usaka kunena kika? Yesu ufunkila pa bubikadi bwa Bulopwe bwandi bwa ndoe bwa myaka kanunu.

Pano kepadi myaka 6000, muzo wa muntu ususuka’nka kususuka mu bupika bwa Satana Dyabola, na bukalabale ne na mavita a bukīle bukya. Ino mu dya Sabado dikatampe dya buludiki bwa Kidishitu mukekalanga kukokolokwa ku masusu ne ku kumweshibwa malwa. Mateo 12:1-8; Levi 24:5-9; 1 Samwele 21:1-6; Umbadilo 28:9; Hosea 6:6.

▪ I matope’ka atopekwa bana-babwanga ba Yesu, ino Yesu walondolola’po namani?

▪ I kilubo’ka kidi na Bafadiseo kyebatuluja Yesu?

▪ Yesu i ‘Mfumwandya dya sabado’ mu buluji’ka?