Shapita 40

Ufundija Kwifwila Lusa

PADI Yesu ukidi monka mu Neni, mwaasangwile panopano mwana-mulume mwanā mukaji wa kishala, nansha padi wenda upempula bibundi bya pabwipi. Mufadiseo umo utelwa bu Shimona ukimba kwimwena uno muntu ulonga bya kwakamwa uno muswelo. Penepo waite Yesu bakadye nandi kwandi.

Yesu wamone amba uno i mukenga wa kukasapwila boba bakatanwa’ko, waitabija luno lwito monka mwaitabijijanga ngito ya kukadya pamo na basonkeji ba musonko ne babipya-mambo. Yesu watwela mu njibo ya Shimona, ino kebamutambwile’mopo na kizaji kitambulwanga nakyo beni.

Badi na kibidiji kya kutambula beni ne kwiboija maulu na mema atalala, mwanda muntu uvwele bikwabilo utamba mu bula bwa ntanda, mu mashinda a luvumbi, maulu andi i matokane, kadi makabe kyanga. Ino Yesu kasha afikile kebamoijepo maulu. Ne kumulubula na lwimu lwa pa kanwa mulongelwanga kwine mpikila. Kadi kebamupelepo māni a kwishinga ku nywene ateñwanga beni.

Abo bakidya, beni bonso bakishikete ku meza, mwana-mukaji umo wabembelela mu njibo pampikwa kwendelwa. I muyukane mu kibundi monso amba byabubi byo byandi. Bimweka bu waivwana bufundiji bwa Yesu, bwa lwito lwityilwe ‘boba bonso balēmenenwe amba bāye batūkijibwe mityima.’ Watengwa bininge na myanda yaivwene ne yamwene, pano wenda ukimba Yesu.

Uno mwana-mukaji wapite kunyuma kwa Yesu ushikete ku meza, wamubandamina ku maulu andi. Impolo yandi keipungulukila pa maulu a Yesu, ebiya weipampula na nywene ya ku mutwe wandi. Wamwimuna ku maulu lwimu lwa ku kanwa, wapungulula māni mu ndalabo, wamushinga’o ku maulu. Shimona wamukengula. Koku ubila munda, amba: “Uno shi wadi mupolofeto, longa nankyo wayūka uno mwana-mukaji bidi muswelo wandi, byāmutenga, ke-muntu i kipya-mambo.”

Yesu pa kuyuka milangwe yandi, wamunena’mba: “Abe Shimona ngidi ne kamwanda ka kukusapwila.”

Nandi wamulondolola’mba: “Abe Mufundiji, bēsambe.”

“Ebiya kwadi mwapulwa umo wa bantu babidi ba mwapwile,” ye Yesu papo washilula. “Umo wāpwile tutwa tutano twa ndenadi, kadi mukwabo makumi atano. Ebiya babudilwe byakumulubwila, ino aye webalekela’yo bitupu bonso babidi; nanshi ino nsapwile kwa babidi’ba, lelo umusanswa pakatampe i wepi?”

“Kepabulwe padi, [i] enka yewa wa kulekelwa bingi,” ye Shimona ulondolola; pakwabo walakana kino kipangujo kimweka bu kyampikwa kukwatañana na mwanda wisambwa.

“Eyo, nanshi ubakete biyampe,” ye Yesu unena. Papo wavundamukila kudi mwana-mukaji, kasapwila Shimona amba: “Ubamone uno mwana-mukaji, a? Natwela mu njibo yobe, īno abe kumpa mema a ku maulu ami, mhm, ino uno mwana-mukaji wamombeja maulu ne mipolo, kadi weapampula ne nywene ya ku mutwe wandi. Lwimu lwa ku kanwa abe kumpelepo, nanshi uno mwana-mukaji ne po natwela pene muno, aye kalekele’byo kungimuna ku maulu, lwimu lwa ku kanwa. Ku mutwe wami kunshingako mani mpika, ino uno mwana-mukaji aye wanshinga ku maulu mani.”

Uno mwana-mukaji walombola patōka amba wesāsa na mutyima umo byabubi byandi bya kala. Penepo Yesu wafule kishima’mba: “Penepo po pa mwanda o nkunena’mba: Myanda yandi mingi ibamulekelwa, ke-muntu kunsanswa wansanswa pakatampe pene, ino yewa walekelwa bityetye aye usanswa patyetye.”

Yesu ketabijepo byabubi nansha kutala’byo kilomonyeka. Ino kino kilongwa kibalombola’mba Yesu uyukile kwivwana ne kwitūla pa kyaba kya bantu balongele bilubo mu būmi bwabo, ino bealakanya’byo, bafika kudi Kidishitu wa kwibatūkija mityima. Mwanda wa kutūkija uno mwana-mukaji mutyima byabinebine, Yesu wamunena’mba: “Myanda yobe ibakulekelwako. . . . Lwitabijo lobe lubakupandija, enda biyampe.” Luka 7:36-50; Mateo 11:28-30.

▪ Yesu watambulwa muswelo’ka na Shimona, mufikilwa wandi?

▪ I ani ukimba Yesu, ne mwanda waka?

▪ I kyelekejo’ka kyaleta Yesu, ne wekingidija muswelo’ka?