Shapita 42

Yesu Utopeka Bafadiseo

YESU wafuna, amba wivwane mpañanga bademona ku bukomo bwa Satana, nankyo Satana i mwilale. “Mutyi wikale shi muyampe, shi mubi, ne bipa byao monka,” ye aye ukinena, “ke-muntu mutyi uyūkilwa’nka ku byo upanga.”

Bine, kunena’mba bipa biyampe bya kupanga bademona i bilupuke ku mwingilo wa Satana umwingidila Yesu i bulembakane. Shi kipa i kiyampe, nankyo mutyi ke mubipo. Ino, bipa bibi bya Bafadiseo bya matope obatopeka Yesu byabituputupu ne mushikwa obamushikilwe pakubulwa mwanda bilombola’mba abo’ko bo babi. “Bānwe bāna ba banyoka!” ye Yesu wibanena, “mukokeja kunena bintu biyampe namanyi shi banwe bene mwi babi? Mwanda kyakanwa kinenanga’nka byobya biyule mu mutyima.” (MB)

Nsambu yotukatyibilwa ikalonda ne mu byotunena, mwanda binenwa byetu bilombolanga mwikadile mityima yetu. “Nemunena’mba,” ye Yesu unena, “myanda yonsololo ya kinenenene, īnenwa ku bantu, bakēmukanga’yo mu difuku dya kidye kya mambo. Mwanda monka mu binenwa byobe ino mo monka mōkamwena nsambu, kadi mo monka mumweka ne kuponejibwa i monka mu binenwa byobe.”

Nansha byalonga Yesu bino bintu bya kwakamwa, kudi basonekeji ne Bafadiseo i bweleyombo, balomba’mba: “Abe Mufundiji tusaka tumonepo bidi kiyūkeno kudi abe.” Nansha shi bano bantu betolwela pabo batambile ku Yelusalema kebamwene bingelengele byandi, ino kudi bukamoni bumweke bwambulwa utatana’bo bulombola bino bingelengele. O mwanda Yesu wasapwila bendeji ba Bayuda’mba: “Lukongo lubi ne lwa makoji lusaka kyonka kiyūkeno, nanshi ne kiyūkeno kīne kekikapebwa’lopo, mhm, poso kyonka kiyūkeno kya yewa mupolofeto Yona.”

Yesu webashintulwila buluji bwa byanena, amba: “Monka mwāikadile Yona munda mwa nyema mukatakata wa dijiba mafuku asatu, mwinya ne bufuku, kadi i enka nabya ne Mwanā muntu nandi ukēkalanga munda mwa panshi mafuku asatu, mwinya ne bufuku.” Yona wāmininwe na mushipa, kupwa wātamba munda mwao’nka bwa muntu musanguke, nanshi Yesu unena’mba aye usa kufwa, ebiya mu difuku dyabusatu asangulwe mūmi. Ino nansha ke pasangwilwe Yesu mwenda mafuku, bendeji ba Bayuda bakipela “kiyukeno kya . . . Yona.”

Penepo Yesu wanena’mba bantu ba mu Nineva bāikele kwalamuka pa mutyima pangala pa busapudi bwa Yona bakasangulwa mu butyibi mwanda wa kuponeja bano Bayuda bapela Yesu. Wadingakanya muswelo umo onka na mulopwe-mukaji wa Sheba wātambile ku mfulo kwa ntanda mwanda wa kwiya kwivwana tunangu twa Solomone, wātendela byaāmwene ne byaāivwene. “Ino monaipo bidi,” ye Yesu wibakoma, “nanshi wakukilapo Solomone buleme ukidi ponka pano.”

Kupwa Yesu waleta kifwa kya muntu utambilwe na mushipiditu umbi. Inoko uno muntu waleka kuyuja bintu biyampe popa pashele kipunzu, penepo wakwatyidilwa na mishipiditu isamba-ibidi imbi kupita. “E mo kikalongela ne ku luno lukongo lubi enka namino,” ye Yesu unena. Bine, muzo wa Isalela wadi ke musubulwe ne kulongololwa dipya—pamo bwa muntu mulupulwe mushipiditu umbi kitatyi kityetye. Ino uno muzo byowapela bapolofeto ba Leza, kupityidila kadi uwapangapanga ne Kidishitu mwine, kino kilombola’mba mityima yabo imbi iyabipidila kupita moyadi ikadile ku ngalwilo.

Aye Yesu ukinena, inandi ne banababo abaiya kebemene kufula kwa kibumbo. Penepo muntu umo wamunena’mba: “Tala bidi, inobe ne bāna benu bēmene munyumā’mu basaka kukunena.”

“Lelo lolo ne bāna betu i bāni le?” Ye Yesu wipangula. Kupwa wafunka kuboko kudi bandi bana-babwanga, amba: “Monaipo, balolo ne bāna betu. Ke-muntu yewa wakulonga kiswa-mutyima wa Tata wa mūlu, nabya ye tūtu ne kāka wami ne lolo.” Yesu usaka kulombola’mba nansha musuku wa na balongo bandi byoudi wa bulēme namani, inoko kipwano kyandi na bana-babwanga kyo kidi na bulēme kupita. Mateo 12:33-50; Mako 3:31-35; Luka 8:19-21.

▪ Bafadiseo abakomenwa namani kulonga “mutyi” ne “bipa” bikale byonso biyampe?

▪ ‘Kiyukeno kya Yona’ i kiyukeno’ka, ne kibapelwe mwenda mafuku muswelo’ka?

▪ Muzo wa Isalela wa mu myaka katwa imbajinji udingakene namani na muntu ulupukilwe na mushipiditu umbi?

▪ I muswelo’ka watyityija Yesu kipwano kyandi kya mpwaninīne na bandi bana-babwanga?