Shapita 44

Utalaja Kimpumpu Kikomokomo

YESU wadi muvudilwe mingilo difuku dyonso dituntulu, wafundija bibumbo byadi ku mbadi ya dijiba, ku mfulo washintulwila bandi bana-babwanga byelekejo pa bunka bwabo. Dyuba ke ku kyolwa, Yesu webanena’mba: “Twabukilei bidi ku bobwa bukila.”

Kupita bukila bwa kutunduka bwa Dijiba dya Ngadilea kulunguluka kumeso, kudi ntanda itwa bu Dekapodi, dino dijina ditambile ku bishima bya Kingidiki, deʹka ushintulula’mba “dikumi,” ebiya poʹlis, “kibundi.” Bibundi bya Dekapodi kyo kitako kya bibidiji bya kishi bya Bangidiki, nansha bishikete’mo Bayuda bavule. Mwingilo wa Yesu mu ino ntanda i mutyetye bininge. Monka motusa kumwena, ne mu luno lwendo lwine basa kumukankaja kwija’mo.

Yesu wanena bandi bana-babwanga’mba tutalukei twende bobwa bukila, nabo ne kushishikita mpika, abamusela mu bwato. Ino lwendo lwabo kelufyemepo. Bantu bakwabo nabo abaikila mu mato abo kebenda nabo pamo. Kwa kwabukila ke kulampepo. I kyabine, mwanda Dijiba dya Ngadilea didi’nka na makilometele kubwipi kwa 20 mu bula ne 12 mu bunkimbwa.

Yesu wakōka ne kakōkelo. O mwanda abo bataluka kebenda, Yesu wasengalala dya ku mutofi wa bwato wa kunyuma, wasaika mutwe pa musao (musamo), wapone mu tulo kalēle. Batumibwa bavule i bamvuwi bapotolwele’byo, bebidile pa Dijiba dya Ngadilea pabo pobakatanga mishipa. Abekwata’ko na koba bwato.

Inoko luno lwendo kebendele’lopo biyampe. Mwanda mema a dijiba i makabe, mbeyabeya yao idi munshi mwa mbeyabeya ya kalunga ka mema kintu kya metele 200, ne byokupukuma luvula lwa mashika lutamba ku ngulu ya pabwipi po pene, luno luvula pa kutetuka, kelwijangapo, umona’nka pano lubakolomona kimpumpu kikomokomo pa dijiba. Mo monka mobyalongekela ne pano. Kepejijepo mantanki keakupila ku bwato, aponena munda, bwato kebuyula mema. Aye Yesu papo ulēle!

Bano balaba bebidile mema abekwata’ko keboba bwato. Eyo, bavuwanga kitatyi kipukumanga bimpumpu. Inoko pano bibebapu bunwa. Pa kutyina’mba bakafwa, abalangula Yesu. ‘A Mfumwetu, le kumwenepo’ni? Ketulobela!’ bo abo babija. ‘Witupandije, twakakuluka!’

Yesu walanguka, wanena luvula lupukuma pa dijiba’mba: “Ish! Talala nya-ā!” Luvula lukomo lubaleka kupukuma ne dijiba dibatalala nyāa. Kupwa watadīla kudi bandi bana-babwanga kaipangula’mba: “Lelo kyo mwakwatyilwa moyo i kika? Lelo i namani le kemudipo ne lwitabijo’ni?”

Papo bana-babwanga abakwatwa moyo kashāa. ‘Lelo uno muntu i ani le?’ bo abo beipangula, ‘mwanda usoñanya nansha ke luvula ne mema, byonso bimukōkela.’

Yesu udi na bukomo kashāa! I bine, kino kitupa kikulupiji amba Mulopwe wetu udi na bukomo bukomena ne bintu bya kipangila, ne amba kitatyi kyakata mutyima wandi onso pa ino yetu ntanda mu Bulopwe bwandi, bantu bonso bakashikata na mutyima-ntenke pampikwa kutyina bimpengele bya ntanda!

Kimpumpu kibatalala, pabapite kakitatyi katyetye, Yesu ne bandi bana-babwanga abafika bakomo bukila bwa kutunduka. Kekubulwe padi bantu ba mu mato makwabo abatyina kimpumpu, abajokela kwabo bakomo. Mako 4:35–5:1; Mateo 8:18, 23-27; Luka 8:22-26.

▪ Lelo Dekapodi i kika, ne kikalanga kwepi?

▪ I bintu’ka bikolomonanga bimpumpu bikomokomo pa Dijiba dya Ngadilea?

▪ I kika kyalonga bana-babwanga pa kumona’mba bwino bwabo bwa mu kuvuwa kebwibapandijapo?