Shapita 49

Lwendo Lukwabo lwa Busapudi mu Ngadilea

YESU wapu kubwipi kwa myaka ibidi mu busapudi bonkabonka, lelo pano usa kukōka ne kwitūkija? Mhm, aye mwine po pene washinsakanya mwingilo wandi wa busapudi na kukuta lwendo lukwabo, lo lwabusatu mu Ngadilea. Wenda upempula bibundi byonso, bikatampe ne bityetye mu uno mwaba, ufundija mu mashinakoka ne kusapula myanda miyampe ya Bulopwe. Bintu byamona mu luno lwendo bibamupe kininga kya kushinsakanya mwingilo wa busapudi kupita mu ñendo imbajinji.

Konso kwenda Yesu, wenda utana’ko bibumbo bya bantu basaka kubelulwa ne kusengibwa kumushipiditu. Webakwatyilwa lusa, mwanda badi pamo bwa mikōko yampikwa mukumbi, mitendwe moya, mikusankane. Kasapwila bandi bana-babwanga’mba: ‘Eyo, mwangulo i mukatampe, ino bengidi bo batyetye. Nanshi, abijai Mwinē mwangulo atume bengidi mu mwangulo wandi.’

Yesu wakwata’po mpango. Wakonge batumibwa 12 baatongele pano kepadi kintu kya mwaka mutuntulu. Webabanya babidi babidi, wabwanya bisumpi bisamba bya basapudi, kaebape misoñanya. Webashintulwila’mba: “Kemukenda ku dishinda dyenda ku baJentaila, nansha kutwela mu kibundi kya bene Samadia, mhm. Poso mwende konka ku mikōko mijimine ya bwine Isalela. Kadi byo muya’byo, mwenda musapula’mba, bulopwe bwa mūlu bubafwena pa bwipi.”

Buno Bulopwe bobendela kukasapula i bobwa bwebafundije Yesu kulomba mu milombelo ya kulondela’po. Bubafwena mu buluji bwa’mba Yesu Kidishitu, Mulopwe utongelwe na Leza, udi’po. Pa kusaka’mba bana-babwanga ba Yesu beyuke bu babilolo ba umbikalo upityile wa bantu kulampe kwine, webape bukomo bwa kubelula babela ne kusangula bafwe. Webasoñanya bakalonge ino mingilo yonso ku bitupu.

Kupwa wakankaja bandi bana-babwanga kusela mpao mu luno lwendo lobendela kukasapula. “Kemukakimba byakomeka mu ñonga yenu nansha nsahabu, nansha mukuba mwine, nansha mukōlo wa dishinda, nansha bikutu bibidi, nansha bikwabilo, nansha mukombo mwine, ke-muntu wamīngilo wafwaninwa nandi kudishibwa.” Boba bakasangela musapu bo bakatūla byabuntu bya bidibwa ne mobo mwa kufikila. Monka mwanenena Yesu: “Mu bibundi byonso byo mukatwela, shi mu bikatampe, shi mu bityetye, mukasaka monka mwine ufwaninwe biya, e mo mukafikila, ne byo mukataluka.”

Kupwa Yesu webalombola mwa kufwenena benē mobo na musapu wa Bulopwe. “Pa kufika mu njibo,” ye aye wibasoñanya, “mwibēmune bidi. Kadi binebine shi njibo umbeīmone mifwaninwe ndoe, nankyo ndoe yenu ifikile monka; nanshi shi keīfwaninwe nabya ndoe yenu yalukile konka ko mudi. Ebiya yewa wakubulwa kwimusepelela, nansha kwivwana myanda yenu mpika, nabya pa kutambamo, shi mu njibo, shi mu kibundi, ke kukulei luvumbi ku maulu enu.”

Yesu wanena’mba, kibundi kikapela musapu wabo kikatyibilwa butyibi busansa mutyima. Webashintulwila’mba: “I binebine byo nemunena’mba: Mu dyodya difuku dya kidye kya mambo ntanda ya Sodoma ne Ngomola i patyetye, ino kyakyo kibundi kikakila kupya pakatampe pene.” Mateo 9:35–10:15; Mako 6:6-12; Luka 9:1-5.

▪ I kitatyi’ka kyashilula Yesu lwendo lwabusatu lwa busapudi mu Ngadilea, ne luno lwendo lubamupe kininga kya kulonga bika?

▪ Kumeso kwa kutuma batumibwa bandi 12 mu busapudi, i misoñanya’ka yaebape?

▪ Mwanda waka i kyendele’mo kudi bana-babwanga kwenda kusapula amba Bulopwe bubafwena pabwipi?