Shapita 50

Kwilongolola ku Kupangwapangwa

YESU wapu kufundija batumibwa bandi miswelo ya mwa kukengidila mwingilo wa busapudi, pano wibadyumuna ku babinkwa nabo. Amba: “Talai bidi byo nemut[um]a bwa mikōko mubukata mwa bampumpi, . . . mwikale kudyumuka bantu, mwanda bakemusokwela ku bidye bya bakulumpe ne kwimukupilakupila mu mashinakoka abo. Ino kadi mukaletwa ku meso a bambikavu ne a balopwe, mwanda wa amiwa.”

Nansha Yesu byayukile amba balondi bandi bakapangwapangwa bisansa mutyima, inoko webalaya na kwibakankamika’mba: “Ino shi abēmusokwela nabya kemukazuzukuta’mba: Le tukanena namani? ke-kintu kikemupebwa mu dyonka adya dyuba kyo mukēsamba. Nanshi ke bānwe bakanena, mhm, poso enka [m]ushipiditu wa Shenu o ukēsamba munda mwenu.”

“Ne” kadi, ye Yesu ukinena, “wa mwanabo ukamusokwela mwanabo ku lufu, bāshamuntu ne mwana nabo monka, ino bāna kadi bakatombokela bakwibabutula ke bebēpaīja.” Wabweja’ko amba: “Mukashikibwa ku bantu bonso, mwanda wa dijina dyami, ino yewa wakūminina pototo, ne kumfulo kwine, ye ukapandako.”

Busapudi budi na mvubu imbajinji. O mwanda Yesu waimanina bininge pa kwikala na manwa mwanda wa kwikala na bwanapabo bwa kuvuija uno mwingilo. “Shi abēmupangapanga mu kimo kibundi,” ye aye unena, “nankyo mwanyemena mu kingi nakyo, mwanda i binebine byo nemunena’mba, kemukapupo kusambakanya bibundi bya Isalela Mwana wa muntu kufika mpika.”

Eyo, tuyukile amba uno musoñanya ne kidyumu, ne kukankamikwa, Yesu wāpene’byo ku batumibwa bandi 12, ino byādi bya kukekala na mvubu ne ku boba bakaputumina mu busapudi kujokoloka ntanda yonso kupwa kwa lufu ne lusangukilo lwandi. Kino i kilombolwe mu binenwa byandi bya’mba, bandi bana-babwanga ‘bakashikibwa na bantu bonso,’ ke enkapo na bene Isalela kete batuminwe’ko batumibwa kukasapula, mhm. Kadi batumibwa kebatwelwepo ku meso a bambikavu nansha a balopwe popa pebatumine Yesu mu lwendo lwabo lwīpi lwa busapudi. Kadi ne boba baitabije bene kebasokwedilwepo ku lufu na balongo babo mu lwine lwendo’lo.

Nanshi panena Yesu amba bandi bana-babwanga kebakapupo lwendo lwabo ‘kufika ne pakāya Mwanā muntu,’ witulombola mu binenwa bya bupolofeto amba, bandi bana-babwanga kebakasambakanyapo ntanda yonso na kusapula Bulopwe bukatūla’ko Leza, aye Mulopwe Yesu Kidishitu kufika mpika bu mudyavita mufikidiji wa byonso wa Yehova ku Amakedona.

Yesu pa kwendelela na kuleta misoñanya yandi ya busapudi, wanena’mba: “Mwanā-bwanga katabukapo shandi dya bwanga, ehe, nansha umpika kakilepo mfumwandi.” Nanshi balondi ba Yesu bafwaninwe kuyuka’mba, nabo bakasusulwa ne kupangwapangwa enka na mwaikele kulongelwa aye pa mwanda wa kusapula Bulopwe bwa Leza. Webadyumuna kadi amba: “Kemukakwatwa moyo boba bakwimwipaya yonka ngitu, kuyūka mwakwipaīla mutyima [muya, NW] mpika, poso o mukatyina moyo i yewa uyūkile kona mutyima [muya, NW] ne mubidi byonso mu Ngehena.”

Yesu mwine wāshile kifwa mu uno mwanda. Wāūminine mu lufu pampikwa moyo pa kyaba kya kutuna dikōkeji dyandi kudi Yehova Leza, Mwinē bukomo bonso. Eyo, Yehova ye ukokeja kwipaya “muya” wa muntu (ko kunena’mba lukulupilo lwa muntu lwa kukekala bu muya mūmi mu mafuku a kumeso), kadi ye yenka ukokeja kusangula muntu ne kumupa būmi bwanyeke. Bine, Tata wa mūlu Yehova i Leza udi na buswe ne kanye!

Kadi Yesu wakankamika bandi bana-babwanga na kyelekejo kilombola patōka’mba Yehova wibatele mutyima mpata. ‘Mwene bapotanga misolwe ibidi ku lupeto lwa mvubu mityetye?’ ye aye wibepangula. ‘Ino i kutupu nansha umo utumbanga panshi aye Tata kuyuka mpika. Nansha ke nywene ya ku mutwe wenu mine i mibalwe yonso. Shi ke pano kemwakityinai: mukidile mpata misolwe mivule bulēme.’

Musapu wa Bulopwe wapāna Yesu ku bandi bana-babwanga kukasapula ukakalañanya mobo, ke-pantu mu kisaka kimo bamo bakeutambula, ino bakwabo bakeupela. “Kemukinenai amba, wīdile kutūla ndoe panopantanda, mhm”; ye aye ushintulula, “nkiīdile kutūla ndoe ami, ehe, i lupete lonka ludipo.” Kino kilombola’mba, muntu wa mu kisaka pa kulonda’ye bubinebine bwa Bible, bimusakila kulonga buninge. “Yewa wakusanswa shi shandi, shi inandi, pakatampe amiko patyetye, nabya kamfwaninwe[po] ami, mhm,” ye Yesu unena. “Kabidi yewa ukasanswa shi mwana mwana-mulume, shi mwana, mwana-mukaji, pakatampe amiko patyetye, nabya nandi kamfwaninwe[po] ami, ehe.”

Pa kufudija misoñanya yandi, Yesu walombola’mba boba batambulanga bandi bana-babwanga bamutambulanga ne aye mwine. “Yewa wakukapana kyonka kitomeno kya mema atalala a kutoma kudi kamo ka totwa tutyetye, mu dijina dya mwanā-bwanga nabya, i binebine byo nemunena’mba, nandi kabulwepo mpalo yandi nansha patyetye, mhm.” Mateo 10:16-42.

▪ I bidyumu’ka byaleta Yesu ku bandi bana-babwanga?

▪ I kukankamikwa’ka kwaebakankamika ne busengi’ka bwaebasenga?

▪ I kika kinenenwa amba misoñanya ya Yesu itala ne bene Kidishitu ba mu ano etu mafuku?

▪ Mwanā-bwanga wa Yesu katabukilepo shandi dya bwanga mu buluji’ka?