Shapita 51

Kwipayañana ku Masobo a Difuku dya Kubutulwa

YESU ke mupwe kupa bandi bana-babwanga misoñanya, webatume babidi-babidi mu mwaba. Kepabulwe padi ba Petelo ne Andele bana na bana abaenda pamo, Yakoba na Yoano, Fidipa na Batolomyu, Tomase na Mateo, Yakoba na Fadeusa, Shimona nandi na Yudasa Isakadiota. Bano basapudi batuminwe babidi babidi benda basapula myanda miyampe ya Bulopwe ne kubelula ba misongo mu kingelengele konso kobenda.

Papo Yoano Mubatyiji ukidi mu kifungo. Ke mulāle’mo kintu kya myaka ibidi. Vuluka, Yoano walombwele patōka’mba Heloda Antipese walonga bibi pa kuyata Helodyasa, mukaja mwanabo Fidipa, ke wandi. Yoano wasokwedile buno bushinka patōka monka mobifwaninwe, mwanda Heloda Antipese wadi wianya bu muntu ulonda Bijila bya Mosesa. O mwanda Heloda waeleje Yoano mu kifungo, padi i na nsongyansongya ya Helodyasa.

Heloda Antipese wamone amba Yoano i muntu moloke, kadi umwivwananga na nsangaji. O mwanda wakomenwa kya kumulonga. Helodyasa aye i mushikwe Yoano, ukanina’nka kumwipaija. Ku mfulo, pa kumwipaila padi pakimbwa pabamweka.

Papo kebalumba ku Pashika wa mu 32 K.K., Heloda wasoba masobo makatampe a kuvuluka difuku dyobāmubutwile. Waite bandi bamfumu ba majina ne bamudyavita, waite ne mitwe ya bibundi bya Ngadilea. Kyolwa pa kōloba, abatweja Salome, mwanā Helodyasa mwana-mukaji waābutwile na Fidipa, wandi mulume wa kala, waimana kaji ku meso a betwa. Bana-balume bonso badi’po mityima iyebapena munda pa kumona mujīlo wandi.

Heloda watōkelwa Salome kashāa. “Tonga kyōsaka shi kika nkupe’kyo,” ye aye unena. Watyipe ne kutyipa’mba: “Kyonso kyo wakalomba, shi kika, nkupa’kyo, shi mutamba wa bulopwe bwami.”

Kumeso kwa kulondolola, Salome waenda kukepangula inandi. Amba: ‘Le nkalombe kika?’

Kyaadi usaka kibamweka! “Katonge mutwe wa Yoano Mubatyiji,” ye Helodyasa ulondolola pampikwa nansha kwishisa.

Bukidi bonka, Salome wajokela kudi Heloda, wamulombe’mba: “Nsaka nanshi bampe mutwe wa Yoano Mubatyiji mu lūvu.”

Heloda wafitwa bininge. Ino pa mwanda wa betwa bapwile kala kwivwana mutyipo wandi, mwa kulekela kufikidija’o mubamupu bunwa, nansha byoulomba kwipaya muntu wampikwa mwanda. Ngipayañani watumwe ku kifungo ponka na ponka na uno musoñanya ulengeja moyo. Kepejijepo, wajoka na mutwe wa Yoano mu lūvu, wape’o Salome. Nandi weusela kakape’o inandi. Bana-babwanga ba Yoano pa kwivwana namino, abaiya abasela umbidi wandi abakeujika, kupwa abakalombola Yesu uno mwanda.

Mwenda mafuku, Heloda waivwana’mba Yesu au koku ubelula bantu, upanga ne bademona, moyo uwamukwata, amba bine yao Yesu i Yoano wasanguka mu bafwe. Penepo kakimbe kumona Yesu ne mikeketo, kyamukimbila ke kwivwanapo busapudi bwandi, ino umukimbila kujingulula shi byatyina i byabine nansha shi i byabubela. Mateo 10:1-5; 11:1; 14:1-12; Mako 6:14-29; Luka 9:7-9.

▪ Mwanda waka Yoano udi mu kifungo, ne mwanda waka Heloda kasakepo kumwipaya?

▪ Ino ku mfulo Helodyasa wamone pa kwipaijija Yoano muswelo’ka?

▪ Mwanda waka Heloda usaka kumona Yesu kupwa kwa lufu lwa Yoano?