Shapita 53

Muludiki Usakibwa Upityile’ko Bantu Bukomo

YESU wadisha tununu twa bantu mu kingelengele, bantu abatendela. “Nanshi i binebine uno’u i yewa mupolofeto wakwiya panopantanda,” bo abo banena. Abafule ku kunena’mba, Yesu ke’nkapo mupolofeto mukatakata kupita Mosesa kete, mhm, ino kadi ye muludiki mwine usakibwa. Penepo abakute nkuku ya kumukwata bamubikike bu mulopwe.

Yesu wanañuna nkuku ikuta bano bantu. Penepo wanyemenena, kutyina’mba bakamubikika ku bukomo. Walundula bibumbo, wasoñanya bandi bana-babwanga’mba ikilai mu bwato mujokele ku Kapanama. Kupwa waenda kukalombela mu lūlu. Bufuku’bo, Yesu washala’ko kasuku kandi.

Abo bufuku kebulumba ku nkya, Yesu wimene pa mutenta, wamone mabimbi ela mantanki pa dijiba papukuma luvula lukomokomo. I mu mafuku alumba ku Pashika, mu kitōkeji kya kweji ke mwale kibenji, Yesu wamone bandi bana-babwanga balumbalumba na bwato, balwa na kubinda mabimbi. Balume nobe bavuwa na bukomo bonso.

Yesu pa kumona namino, watūka ku lūlu kaenda ulandala pa mabimbi, wenda ulumba dya ku bwato. Yesu wapeta bwato, papo ke bwende makilometele atano nansha asamba. Penepo kaenda bwa aye usaka kwibapita. Bana-babwanga abamumone, kebela mabila’mba: “I kimonwa.”

Yesu webakankamika’mba: “I amiwa uno, kemukikwatwa moyo.”

Ino Petelo wanena’mba: “Abe Mfumwami shi wi abe, nankyo unene nami mfike kōdiko nyanta pa mema.”

“Iya!” Ye Yesu umulondolola.

Petelo kanenejepo, watabuka mu bwato kaenda ulandala pa mema, wenda kudi Yesu. Ino Petelo pa kutala mupukumina luvula, moyo uwamukwata, washilula kukuluka, kaabija: “Mpandije abe Mfumwami!”

Yesu wamolwela kuboko, wamukwata, kamunena’mba: “Yō! lwitabijo i lutyetye nanshi! Le kika kyōzumbakenya mutyima?”

Abo ba Petelo ne Yesu bekila mu bwato, luvula nalo lutaledidila, papo bana-babwanga kebatulumuka. Lelo badi ba kutulumuka? Shi badi amba balamine ‘buluji bwa mikate’ na kwivwanija kingelengele kikatampe kyadi kibalonga Yesu masaa matyetye kunyuma, pa kudisha tununu twa bantu na mikate itano ne tumwita twa lui tubidi kete, longa kebatulumukilepo bininge pano paalandala pa mema ne paatalaja luvula. Ino pano, bana-babwanga abamufukatyila kebamunena’mba: “I binebine nanshi abewa wi Mwanā Leza.”

Kebejijepo, abafika ku Ngenesaleta, musanza muyampe, wa nshi ikunga bidibwa, udi pabwipi na Kapanama. Abashīka bwato konka. Ino abo pa kwabukila ku mbadi, bantu abajiula Yesu kebakasela babela ba kubwipi kubwipi. Abaiya nabo bebaselele mu bitalu, abo batenga’tu ku milomo ya mutwelo wa Yesu, kupwididile, abapwibwa.

Papo, kibumbo kyadi kimwene kingelengele kya bidibwa byadi bidile bantu tununu kibayuka’mba Yesu waenda. Ato tumato tutamba ku Tyibileasa tufika, nabo abaikila’mo kebenda ku Kapanama kukakimba Yesu. Abamutana, kebamwipangula’mba: “Abe Mufundiji! Le wafikile pano dyuba ka?” Yesu webafunina motusa kumwena panopano’mu. Yoano 6:14-25; Mateo 14:22-36; Mako 6:45-56.

▪ Pano pabapu Yesu kudisha tununu twa bantu mu kingelengele, i bika bisaka kumulonga bantu?

▪ I bika byamona Yesu aye ku lūlu kwanyemene, ne kupwa walonga kika?

▪ Mwanda waka bana-babwanga kebadipo ba kutulumuka pa kumona bino bintu?

▪ I bika byalongeka pa kupwa kushīka’bo ku mbadi?