Shapita 54

‘Mukate Wabine Utambile Mūlu’

DIFUKU dyapita’di dyadi dya binkumenkume. Yesu wadishishe bantu tununu na kingelengele, wanyema ne bantu badi basaka kumubikika bulopwe. Bufuku wadi walandala pa Dijiba dya Ngadilea padi papukuma luvula; waabula Petelo wadi kakuluka pa kulandala pa mema papukuma luvula; watalaja ne mabimbi mwanda wa bandi bana-babwanga baleke kulobela.

Pano bantu badishibwe na Yesu na kingelengele ku bwikike bwa kungala ne kutunduka kwa Dijiba dya Ngadilea abamutana kubwipi na Kapanama, kebamwipangula’mba: “Le wafikile pano dyuba ka?” Yesu webafunina, amba mubaiya kunkimba mwanda wa bidibwa bikwabo bya ku bitupu byomusaka. Webanena baleke kwingidila bidibwa byoneka, ino bengidile bidibwa bya būmi bwanyeke. Nabo abamwipanguja’mba: “I bika byo tukalonga mwakwingidila mīngilo ya Leza?”

Ino Yesu watēla mingilo itabukile mvubu. Amba: “Ino yonka yo mīngilo ya Leza’mba, mwitabije mudi aye wātumine.”

Ino bantu kebetabijepo Yesu nansha byobamwene bingelengele byonso byalonga. I bipwe’nka ne bunwa, aye muntu wapu kulonga bintu kapwila bya kutendelwa, tala bine bino’bi kadi byobamwipangula’mba: “Le [i] kiyūkeno ka kyōloñanga, twikimone, [penepa tukwitabije], i kyepi kyōloñanga? Bakulutuba betu nabo badile mana muntanda mutuputupu, monka mo kisonekelwe’mba: Webapele mikate ya mūlu badya.”

Yesu walondolola pa kiyukeno kyobasaka, webalombola patōka Nsulo mine ya bidibwa bya mu kingelengele, amba: “Mosesa kemupelepo mikate ya mūlu, ehe, nanshi Tata ye wemupa mikate ya binebine ya mūlu. Ke-muntu mukate wa Leza i yewa wakutūka mūlu, kapana būmi [ku ino ntanda].”

“Abe Mfumwetu,” bo bano bantu bamunena, “nanshi wikale kwitupa’yo īno mikate nyeke ne nyeke.”

“Ami enka ne mukate wa būmi,” ye Yesu wibashintulwila. “Yewa wakwiya kwami, nankyo kakamonepo nzala, nansha patyetye, ehe, kadi wakwitabija mudi ami, nabya kakēvwanapo kyumwa, nansha patyetye pene. Ino nemunena’mba: Kumona umbamone, nanshi ne kwitabija, mpika. Bonso bakumpa kudi Tata bakāya kwami, ino yewa wakāya ko ndi, nkikamupangapo, nansha patyetye, mhm. Mwanda ami byo natūkile mūlu naiya pano nkyaīdile kulonga muswidile mutyima wami, poso monka muswidile mutyima wa yewa wantumine. Nanshi kino’ki kyo kiswile mutyima wa Tata wakuntuma pano’mba: Ku kyonso kyo nakupa’kyo kokajimijako nansha kamo katyetye, nanshi ukekisangulanga ku difuku dya mfulo. Kadi kikwabo kiswele mutyima wa [Tata] i kino nakyo, amba bonso bakukumona abe Mwana, ne kukwitabija, nabya bakēkalanga ne būmi bwa kulādila nyeke ne nyeke.”

Pa kino, Bayuda abashilula kwiuningila Yesu, amba mwanda wanena’mba ‘Ami ne mukate utūkile mūlu.’ Abamumone bu muntu’tu, mwana mubutulwe na bantu, pamo’nka na mwamumwenene ba mu Nazala, kebapatanya’mba: “Ke Yesupo uno’u mwana Yosefa, ne bashandi ne inandi twibayūkile bātwe. Lelo mwanda ka kadi wanenena’mba: Natūkile mūlu?”

“Kemukiuningai bānwe bene,” ye Yesu wibalondolola. “Nansha umo wakwīla kwami aye mwine, poso’nka Tata wakuntuma amukokele ko ndi, nami nabya nkamusangulanga ku difuku dya mfulo. Kyasonekelwe mu bapolofeto’mba: Bonso bakalombolwanga kudi Leza. Ino penepo nanshi, bonso badi bēvwana kudi Tata ne kulombolwa bāyanga kwami. Kekudi[po] nansha umo wamwene Tata, mhm, poso’nka yewa wa mwa Leza, nankyo aye ye wamwene Tata. I binebine byo nemunena’mba: Yewa wakwitabija mudi ami, nabya udi ne būmi bwa kulādila nyeke.”

Yesu waendelela na kupituluka’mo amba: “Ami ne mukate wa būmi. Bakulutuba benu byo badile oa mana muntanda mutuputupu kufwa bafwa. Uno nanshi o mukate mwine utūkile mūlu, amba muntu adyeko nabya kakafupo, mhm. Ami ne mukate wa būmi, utūkile mūlu, wivwane muntu adyeko ku uno mukate uno nankyo ukēkalanga ne būmi nyeke ne nyeke.” I amo, bantu balombola lwitabijo mudi Yesu, utuminwe na Leza, bakekala na būmi bwanyeke. Ke manapo nansha mukate ungi kampanda ukokeja kupāna buno būmi!

Mobimwekela, ino mīsambo ya mukate utambile mūlu i mishilule kinondanonda na petene Yesu na bano bantu kubwipi na Kapanama. Ino ikyendelela, ibanane ke mungya kala, pafundija Yesu mu shinakoka mu Kapanama. Yoano 6:25-51, 59; Mitōto 78:24; Isaya 54:13; Mateo 13:55-57.

▪ I binkumenkume’ka bibadikile mīsambo ya Yesu ya mukate utambile mūlu?

▪ Kukwatañana na bintu byapwa kulonga Yesu, mwanda waka kekyendele’mopo kulomba kadi kiyūkeno?

▪ Mwanda waka Bayuda beuninga panena Yesu amba aye i mukate wabine utambile mūlu?

▪ Ino mīsambo ya mukate utambile mūlu isambilwa kwepi?