Shapita 55

Bana-Babwanga Bavule Abaleka Kulonda Yesu

YESU ufundija mu shinakoka mu Kapanama myanda imutala, witela bu mukate wabine utambile mūlu. Ino mīsambo yandi i yonka yobadi bashilwile na bantu kitatyi kyobamutene pa kujoka’bo, batamba Kutunduka kwa Dijiba dya Ngadilea, kobadi badya mikate ne mwita wa lui bya mu kingelengele.

Yesu ukyendeleja myanda yandi amba: “Mukate mwine o nkapana ami i mubidi wami, o nkapanina ku būmi bwa [ino ntanda].” Myaka ibidi kunyuma, ku muketeko wa mu 30 K.K., Yesu walombwele Nikodema amba, Leza i muswe ino ntanda mpata, o mwanda wapāna wandi Mwana bu Mukūdi. Ino pano, Yesu ulombola’mba muntu yense wa ntanda ya bantu ukadya umbidi wandi, mu muneneno wa kyelekejo, na kulombola lwitabijo mu kitapwa kyasa kupāna panopano, ukekala na būmi bwanyeke.

Ino bantu abakukala pa bino binenwa bya Yesu. Kebeipangula’mba: “Le uno’u ayūke namani kwitupa mubidi wandi, ke twiudī?” Yesu usaka bemvwaniki bandi bevwanije amba kuno kudibwa kwa umbidi wandi i kwa kyelekejo. O mwanda waimanina bininge pa kino, wanena kintu kimo kikolomona lupotopoto shi muntu wekilonda pa bute pa bute.

“Wivwane shi kemudilepo ku mubidi wa Mwanā muntu, ne kutoma mashi andi mpika,” ye Yesu unena, ‘nankyo kemudipo na būmi munda mwenu, ehe. Yewa udya ku umbidi wami, utoma ne mashi ami, nabya udi na būmi bwa nyeke, nami nkamusangulanga ku difuku dyamfulo. Mwanda umbidi wami i byakudya bilumbuluke, ne mashi ami mēne i byakutoma bilumbuluke. Ino yewa udya ku umbidi wami, utoma ne mashi ami, udi nami umbumo, ami nami ndi nandi umbumo.’

Bine, shi Yesu wadi amba ufundije kudya mwita wa bantu, longa papo shapo bufundiji bwandi busansa mutyima. Ino na bubine Yesu kasoñenyepo kudya mwita nansha kutoma mashi. Kuno i kukoma’tu kukomeneja Yesu boba bonso basaka kukapebwa būmi bwanyeke, amba bafwaninwe kulombola lwitabijo mu kitapwa kyakaleta kitatyi kyasa kupāna umbidi wandi mubwaninine wa bu muntu, ne kumwanga mashi a būmi bwandi. Eyo, ne bavule umbukata mwa bandi bana-babwanga bene kebevwanijepo bufundiji bwandi, abashilula kwipatanya’mba: “Mwanda uno i mukomo. Lelo i anyi ukokeja kwiumvwana monka!” (MB)

Yesu wamone bandi bana-babwanga bavule beuninga, webanena’mba: “Le kino’ki nakyo kibemukolela namani? Shi kadi mumone Mwanā muntu kakandila kwādi wikele kala, le i namani? . . . Ino myanda yo nēsamba nenu amiwa yo ya mushipiditu ne būmi. Nanshi e ko badi bamo bamo ba ku banwe bampikwa kwitabija.”

Yesu wanena kadi amba: “Po pa mwanda o nemunena’mba: Kekudipo nansha umo wakwīla kuno ko ndi, poso’nka kimupebwe kudi Tata.” Pa kunena namino, bandi bana-babwanga bavule abataluka, abaleka ne kumulonda kwine. Yesu watale kudi bandi batumibwa 12, webepangula’mba: “Lelo ne bānwe musaka kufunduka’ni?”

Petelo walondolola’mba: “Abe Mfumwami, le tukenda kudi ani? Abewa wi wa binenwa bya [būmi b]wa nyeke ne nyeke. Bātwe tubaitabija, ne kuyūka kadi tubayūkidija’mba: Abe wi ukola wa Leza.” Bine, uno i muneneno ulombola dikōkeji, nansha Petelo ne batumibwa bakwabo byokebevwanije senene bufundiji bwa Yesu pa uno mwanda!

Nansha byasangela Yesu kilondololwa kya Petelo, ino wanena’po kishima’mba: ‘Ami nemutongele dikumi ne babidi, le ke amopo? Ino umo wa mu banwe i vubavuba.’ Unenwa uno i Yudasa Isakadiota. Padi Yesu wamone munda mwa Yudasa kemudi “kushilula,” nansha kwalula kwa mwiendelejo mubi.

Mityima ya bantu ke mifīte fututu, mwanda Yesu obadi bafwila kubikika bulopwe webakomena, padi kebalanga’mba, ‘Le uno ekale Meshiasa namani, kyepelo kine kibikīlwe Meshiasa kyokyapela?’ Uno nao i mwanda ukidi mu ñeni ya bantu. Yoano 6:51-71; 3:16.

▪ Lelo Yesu usa kupāna umbidi wandi pa mwanda wa bāni, nabo basa ‘kudya umbidi wandi’ mu buluji’ka?

▪ I binenwa’ka bikwabo bya Yesu byakoleja bantu, ino aye waimanina bininge pa kika?

▪ I bika byalondolola Petelo pa kwikala bantu bavule abaleka kulonda Yesu?