Shapita 59

Lelo Bine Yesu I Ani?

BWATO bwikile’mo Yesu ne bandi bana-babwanga bukishīka’tu mu Beseda, bantu abamuletela mpofu, kebamwisashila’mba amutenge ne kumubelula. Yesu wamukwata ku kuboko kaenda nandi panja pa kibundi, kupwa wamupelela mata mu meso kamwipangula’mba: “Le ubamone bika?”

‘Namone bantu,’ ye uno muntu umulondolola, ‘mwanda namone bintu bimweka pamo bwa mityi, ino abyo biselakana.’ Yesu wamupūta makasa mu meso, ebiya wamupūtula meso kamone biyampe. Yesu wamusoñanya’mba enda kobe, ino kokolwa kukatwela mu kibundi.

Pano Yesu wataluka ne bandi bana-babwanga kebenda ku bibundi bya mu Kesalea Fidipai, dya kungalangalāa kwa Paleshitina. I mutenta mulampe, udi na makilometele kubwipi kwa 48 kufika ku mukenza wanwa wa Kesalea Fidipai, kintu kya metele 350 mu bwimwa tamba ku mbeyabeya ya dijiba. Mobimwekela, i lwendo lwa kulāla tumafuku mu dishinda.

Abo mu lwendo, Yesu wetolwela pa bunka kalombela. Kubamushadila myeji kitema nansha dikumi kete epaibwe, pano kalanga bandi bana-babwanga. Bavule ke baleke kala kumulonda. Bakwabo bamweka bu abakolelwa ne kutyumuka’tu, mwanda wapelele bantu bamubikike bulopwe ne kulombola biyukeno bya mūlu bya kuyukila’po bubikavu bwandi pamulombele’byo balwana nandi. Lelo batumibwa bandi bamuyukile bu ani? Abo pa kwiya kuno kwalombela, Yesu webepanguja’mba: “Lelo bantu banenanga’mba ne ani?”

“Bēsambanga’mba: I Yoano Mubatyiji,” bo abo bamulondolola. “Ino bangi’mba: I Ediya. Bakwabo’mba: I umo wa boba bapolofeto.” Eyo, bantu bafwatakanya’mba Yesu i umo wa pa bano bantu usangukile!

“Ino bānwe nenu’mba ne ani?” ye Yesu wipangula.

Petelo walondolola bukidi bonka’mba: ‘Abe wi Kidishitu, Mwanā Leza mūmi.’

Yesu pa kupwa kwitabija kilondololwa kya Petelo, wanena’mba: “Abe wi Petelo ne pa dino dibwe [dya mwala] napo kadi nkepashimikanga kipwilo kyami, kadi ne binjilo bya kalunganyembo kebikekishindepo.” Pano Yesu walombola’mba usa kūbaka kipwilo, ne amba nansha ke lufu lwine kelukakwatapo nkwatyidile ba mu kino kipwilo kupwa kwa lwendo lwabo lwa kikōkeji pano pantanda. Kupwa wasapwila Petelo amba: “Nkakupa mfungulo ya bulopwe bwa mūlu.”

Pano Yesu wasabe mwanda, amba Petelo usa kupebwa madyese a pa bula. Ino ke kunenapo amba Petelo wapebwa kitenta kibajinji mu batumibwa bakwabo, nansha kutūlwa bu kyalwilo kya kipwilo. Mwanda Yesu ye Dibwe dine dya Mwala dyūbakilwe’po kipwilo kyandi. Ino Petelo usa kupebwa mfungulo isatu ya kushitula nayo, ko kunena’mba, kupa bisumpi bishileshile bya bantu mukenga wa kutwela mu Bulopwe bwa mūlu.

Petelo usa kwingidija lufungulo lubajinji mu dya Pentekosa mu 33 K.K. pa kulombola Bayuda besāsa bintu byobafwaninwe kulonga nabya bapande. Usa kwingidija lwabubidi kinondanonda’tu, pa kushitwila bene Samadia betabije mukenga wa kutwela mu Bulopwe bwa Leza. Kupwa, usa kwingidija lufungulo lwabusatu mu 36 K.K. pa kushitwila Bajentaila bampikwa kutwejibwa kwisao, Konilusa ne balunda nandi, mukenga umo onka.

Yesu ukyendeleja mīsambo na batumibwa bandi. Webatyumuna mityima pa kwibalombola masusu ne lufu bisa kumutana panopano mu Yelusalema. Petelo mulume nobe kaivwanije amba Yesu usa kusangulwa ne kukekala’ye mūlu, wakokela Yesu pafula. Kamunena’mba: “Kokikolwa abe Mfumwami, kino kekidipo nobe pa bwipi, mhm; wididileko lusa.” Yesu wamuvundamina, wamutentulula’mba: “Jokela munyuma abe Satana, ubankolela nanshi, ke-wi-muntu abe kutele[po] mutyima umbintu bya Leza, ehe, poso mu bya bantu.”

I bine, bantu bakwabo ne bana-babwanga benda na Yesu pamo, pano webete abamufwena, kaebashintulwila’mba kwikala mulondi wandi ke mwandapo upēla. “Shi muntu usaka kunonda,” ye aye unena, “nankyo ēpele aye mwine, atekune [mutyi wa masusu, NW] wandi anonde. Ke-muntu yewa usaka kwipandija muya wandi, nabya ukamujimina. Kadi yewa wakwijimija muya wandi, pa mwanda wa amiwa, nankyo ukeumonanga monka.”

I amo, balondi ba Yesu basaka kutambula buntu bwandi bafwaninwe kwikala bakankamane ne kwipela. Wanena’mba: “Penepo nanshi yewa wakumfwila bumvu ami, ne myanda yami mīne kumo, mu luno lukongo lwa bamakoji, ne lwa babipyamambo, nabya Mwanā muntu nandi ukamufwila bumvu pa kwiya mu ntumbo ya Shandi, ne bamwikeulu bandi bakola.” Mako 8:22-38; Mateo 16:13-28; Luka 9:18-27.

▪ Mwanda waka Yesu ulanga bandi bana-babwanga?

▪ Bantu bayukile Yesu bu ani?

▪ I mfungulo’ka yapebwa Petelo, ne usa kwingidija’yo namani?

▪ I kulemununwa’ka kwalemununwa Petelo, ne mwanda waka?