Shapita 60

Nsolweji ya Ntumbo ya Bulopwe bwa Kidishitu

YESU waiya mu mitamba ya Kesalea Fidipai, kafundija kibumbo, ne batumibwa bandi kumo. Webalombola uno mwanda utulumukwa’mba: “I binebine byo nemunena’mba, e ko badi bamo-bamo bēmana pano kebakamonepo lufu, nansha patye, poso’nka bakamone bidi Mwana wa muntu wiya umbulopwe bwandi.”

Bana-babwanga bakokeja kwiipangula’mba: ‘Le bisaka kunena Yesu i bika?’ Papityile’tu kintu kya yenga umo, Yesu wasela Petelo, Yakoba ne Yoano abakanda ku lūlu lupuñame. Bukokeja kwikala bufuku, mwanda bana-babwanga balēle. Aye Yesu ulombela, waalamuka ku meso abo. Mpala yandi keyeñenya bwa dyuba, ne mutwelo wandi keukelema bwa kitōkeji.

Kupwa kubamweka bantu babidi, abajiulwa bu ba “Mosesa ne Ediya,” abashilula kwisamba na Yesu pa mwanda utala lwendo lwandi lwa ‘kutaluka mu Yelusalema.’ Na bubine, luno lwendo i lufu lwa Yesu ne lusangukilo lwandi. Nanshi ino mīsambo ilombola’mba, lufu lwandi lwa kufwijibwa bumvu ke kintupo kya kwepuka, pamo na mwadi mwikisakila Petelo.

Bana-babwanga ke balanguke kala, pano babandila ne kuteja, koku batendela. Nansha byokidi kimonwa, ino kimweka’nka bu kyabine, ye Petelo wekuja mu mwanda’mba: “Abe Mfumwami pano pabetunengelela, shi uswile twipashimike bitanda bisatu, kimo kyobe, kingi nakyo kya Mosesa, kikwabo kya Ediya.”

Aye Petelo ukinena, dikumbi dikelema dibebapūta, diwi dibatambe mu dikumbi amba: “Uno i wami Mwana o nsenswe, untōkele mutyima, mwikale kumwivwana.” Bana-babwanga pa kwivwana dino diwi, abapone bukuvumane. Ino Yesu webanena’mba: “Langukai kemukikwatwa moyo.” Abo pa kulanguka, kebamwenepo muntu nansha umo, poso’nka Yesu.

Bubaki lubanga kebatūka ku lūlu, Yesu webakome amba: “Kemukasapwila muntu kino kimonwa kyo mwamona, poso’nka Mwanā muntu akasanguke bidi ku lufu.” Kumweka kwa Ediya mu kimonwa kubalangula kipangujo mu ñeni ya bana-babwanga. “Lelo,” bo abo bepangula, “i namani bidi basonekeji amba, poso’nka Ediya abadikile kufika?”

“Ediya wapwile kala kufika,” ye Yesu unena, ino “[a]bo kebamuyūkilepo.” Yesu wisambila pa Yoano Mubatyiji wafikidije mwingilo udingakene na wa Ediya. Yoano walongolwedile Kidishitu dishinda pamo’nka bwa Ediya wālongolwedile Edisha dishinda.

Bine kino kimonwa kibakankamika Yesu ne bana-babwanga kashāa! Kino kimonwa i nsolweji ya ntumbo ya Bulopwe bwa Kidishitu. Bana-babwanga abamone nanshi “Mwana wa muntu wiya umbulopwe bwandi,” monka mwebalaile Yesu yenga umo kunyuma. Kupwa lufu lwa Yesu, Petelo usa kusoneka’mba, abo bo ‘batumoni bamwene na meso bukatakata bwa Kidishitu pobādi nandi ku lūlu lukola.’

Bafadiseo badi abalombe Yesu ebalombole kiyukeno kya kumuyukanya’mba ye aye Mulopwe wālailwe mu Bisonekwa utongelwe na Leza. Ino kebapelwepo kino kiyukeno. Ku mutamba mukwabo, kyapelwa bana-babwanga ba Yesu bapwani nandi dyese dya kumona kwalamuka kwa Yesu i mwanda wa bayukile’po amba bupolofeto bwa Bulopwe i bwabine. O mwanda Petelo usa kusoneka mwenda mafuku amba: “Tudi ne mwanda wa [bupolofeto] wa kuningijibwa nakampata.” Mateo 16:13, Mat 16:28–17:13; Mako 9:1-13; Luka 9:27-37; 2 Petelo 1:16-19.

▪ Bantu bamobamo abamone Kidishitu muswelo’ka wiya mu Bulopwe bwandi kumeso kwa kutompa’bo ku lufu?

▪ Mu kino kimonwa, ba Mosesa ne Ediya badi besamba na Yesu mwanda’ka?

▪ Mwanda waka kino kimonwa kibaletela bana-babwanga bukankamane?