Shapita 66

Ku Masobo a Bitanda

YESU watumbe mu myaka kubwipi kwa isatu tamba’tu pa kubatyijibwa kwandi. Tununu tuvule twa bantu ke tumone bingelengele byandi, ne myanda ya mingilo yandi ke misambakane mu ntanda yabo yonso. Pano bantu bamukimba mu Yelusalema mungwidile bantu bavule baile ku Masobo a Bitanda. “Lelo udi kwepi?” bo abo beipangula.

Yesu waikala ke kipateno. Aba amba, “I muyampe.” Bakwabo amba, “Mhm, ōngolanga bantu bitupu.” Mu mafuku a kushilula masobo, i miuningo yonka ya uno muswelo. Ino kekudipo muntu nansha umo usomonwa kunenena Yesu biyampe mu kitango kya bantu. I biñunyiñunyi byonka, mwanda batyina kulupula bitulu na bendeji ba Bayuda.

Ao masobo afika pa bukata, Yesu nandi ufika. Wakanda ku tempelo, kwine kuno bantu kebatendela bwino bwandi bwa kufundija. Bayuda pa kwivwana Yesu namino, muntu kafundile masomo a Bafadiseo, kebeipangula: “Lelo uno uyūkile mikanda īno namani, ne kulombolwapo mpika?”

“Kufundija ko ndi nako kuno kekwamipo,” ye Yesu ushintulula, “nanshi i kwa mwine wāntumine. Shi kudi muntu usakile kulonga muswidile mutyima wandi, nankyo aye ukayūkanga mwendele kufundija kuno, shi kwa kwa Leza, shi nēsambilanga ami mwine.” Bufundiji bwa Yesu i bulamate bininge ku bijila bya Leza. Kino kilombola’mba aye kakimbepo kwitumbija, ino usaka kutumbija Leza. “Le ino Mosesa bidi, kēmupelepo mukanda-wabijila, a?” Yesu webepangula namino. Kupwa webanena na difuno amba: “Nanshi kepadi[po], nansha umo, wa ku banwe’ba ulamine’o mukanda-wabijila, mhm.”

“I mwanda’ka o mukimbila kungipaīla?” ye Yesu wibepangula.

Bantu ba mu kibumbo, nakampata beni, kebayukilepo nkuku imukutyilwe. Balanga’mba kebibwanikapo bantu kusaka kwipaya mufundiji utendelwa namino. Bafwatakanya’mba Yesu udi na kintu kibamubale, o mwanda ulanga nenki. “Nanshi udi na mudemona!” bo abo bamunena. “Le [i] bāni bakukimba kukwipaya?”

I byabine, bendeji ba Bayuda basaka Yesu epaibwe, nansha kibumbo byokitatana uno mwanda. Bano bendeji batompele kwipaya Yesu kitatyi kyaaikele kubelula muntu mu dya Sabado, pano ke papite mwaka umo ne kipindi. O mwanda pano Yesu kasokwela patōka kubulwa milangwe miluji kwabo pa kwibepangula’mba: “Le byo mutweja muntu kwisao mu dya Sabado, mwanda wa kunena’mba: Twakajilula kijila kya Mosesa, penepo i mwanda ka o mu[m]funinina pa mwanda wa kūndapidila muntu monka mu dya Sabado? Kemukadingakanya kala bantu ponka pa kwibamona mu meso, ne wakubinga, ne wakuponapo, ehe, nanshi mukebatyibila nsambu yabo monka mo kyolokele.”

Bene Yelusalema, bayukile kala ino myanda, kebanena pano amba: “Le ke unopo o basaka kwipaya’u? Ino, ivwanaipo bidi, byānenenena nabo ne kumulondolola mpika, nansha katyetye. Lelo bambikavu amba namani, bayūkile’ni, amba: Uno i Kidishitu mwine uno’u?” Bano bene Yelusalema abekwata’ko kebashintulula kyobapelela kwitabija Yesu bu Kidishitu, amba: “Uno tubamuyūka ne kwāfundukile, ino Kidishitu aye pa kwiya kekudi, nansha umo, ukayūka kwāfundukile, mhm.”

Yesu webalondolola’mba: “Mubapu kungyuka ami, ne ko nafundukile nako mubayūka[’k]o. Ino ami nkyetalukile kwīla ami mwine, ino yewa wantalwile kwiya aye i mulumbuluke mwine, o kemuyūkilepo bānwe, mhm. Ami mwine muyūkile, mwanda ntambile konka kwandi kadi wantuma.” Pa kunena’ye namino, abamukalabila amba bamukwatyididile’tu, padi basaka kumwela mu kifungo nansha kumwipaija. Ino abamutunya, mwanda kitatyi kya kufwa kwa Yesu kekyabwene.

Ino bantu bavule abaitabija Yesu, enka na mokyadi kifwaninwe kala. Walandele pa mema, watalaja luvula, watalaja majiba padi palwa mwela, wadisha tununu twa bantu na mikate mityetye ne twita twa lui, wabelula babela, waendeja bisheta, wapūtula meso a bampofu kebamone, wabelula bamakopo, wasangula ne bafwe. O mwanda beipangula’mba: “Le Kidishitu pa kwiya akamutabuke uno’u ku biyūkeno kuvula’ni?”

Bafadiseo pa kwivwana kibumbo kiuninga bino bintu, abo ne babitobo bakatampe abatume bamudyavita kukakwata Yesu. Yoano 7:11-32.

▪ Yesu wafika ku masobo kitatyi’ka, ne bantu banena bika bimutala aye?

▪ I kika kinenena bantu amba Yesu udi na mudemona?

▪ Bene Yelusalema bamwene Yesu namani?

▪ Mwanda waka bantu bavule abaitabija mudi Yesu?