Shapita 72

Yesu Utuma Bana-Babwanga 70

I MU mulanga wa mu 32 K.K., ke myaka isatu mituntulu na pabatyijibwe Yesu. Aye ne bandi bana-babwanga batenwe’nka panopano ku Masobo a Matabenakulo mu Yelusalema, mobimwekela kebaendele kulampe. Bine, Yesu, mu myeji isamba ya mingilo ikimushadile’ko, usa kwija mu Yudea nansha bukila bwa Munonga wa Yodano mu bulolo bwa Pelea. Uno nao i mwaba unenwe kusambakanibwa.

I byabine, papwile Pashika wa mu 30 K.K., Yesu waijije kintu kya myeji 8 mu Yudea, usapula’nka kusapula. Ino kupwa popa pasakile kumwipaya’mo Bayuda ku Pashika wa mu 31 K.K., Yesu wafundije kubwipi kwa mwaka mutuntulu ne kipindi, nakampata mu Ngadilea. Papo ponso wadi ukiteakanya bulongolodi bukatampe bwa basapudi bafundijibwe senene, kino i kintu kyakādipo nakyo ku ngalwilo. Pano washilula kampanye ka kamfula nkonko ka busapudi mu Yudea.

Yesu washilula kano kampanye na kutonga bana-babwanga 70, wibatuma babidi-babidi. Ababwana bisumpi 35 bya basapudi ba Bulopwe basa kukasapula mu uno mwaba. Bano bana-babwanga ababadikila kwenda mu bibundi byonso ne mu byaba byonso mwadi musaka kwenda Yesu na batumibwa bandi.

Pa kyaba kya kutuma bano 70 mu mashinakoka, ino Yesu webanena kukatwela mu mobo a bantu’tu, webashintulwila’mba: “Kadi monso mu majibo mo mutwela mubadikila’mba: Ndoe i yenu, bānwe badi mu īno njibo. Penepo shi mudi mwana wa kuswa ndoe, nankyo ndoe yenu īkamutentaminapo.” Le i musapu’ka obakasapula? “Mukebanena’mba: Bulopwe bwa Leza bubemufwenenena pa bwipi,” ye Yesu unena. Pa mwingilo wa bano 70, dibuku Nshintulwilo ya Matthew Henry (Angele) dinena’po amba: “Konso kobādi bapempula, badi benda basapula ku njibo ne njibo, pamo’nka na mwādi mwenda musapwila Mfumwabo.”

Misoñanya yaleta Yesu ku bano 70 i midingakane na yaaletele ku boba 12 baatumine mu kampanye ka busapudi mu Ngadilea kubwipi kwa mwaka umo kunyuma. Kekelepo kupa bano 70 enka bidyumu pa kukalakanibwa kobakatana ne kwibateakanya mwa kukalombwela musapu ku benē mobo kete, mhm, ino webape ne bukomo bwa kukabelula babela. Pano pasaka kwenda’ko Yesu, bavule bakafwila kwimona na Mfumwandya bano bana-babwanga benda balonga bintu byakutendelwa.

Busapudi bwa bano 70 ne mwingilo wa Yesu wa kulondeja pa busapudi bwabo kebijijepo kitatyi kilampe. Bisumpi 35 bya basapudi ba Bulopwe bibashilula kala kujokela kudi Yesu. “Abe Mfumwetu,” bo abo bamusapwila lusango na nsangaji, “ne bademona badi betukōkela mu dijina dyobe.” Byabine, luno lusango luyampe lwa mwingilo lubasangaja Yesu mpata, webalondolola’mba: “Namwene Satana upona mulu’nka bwa nzaji. Talai, ami nemupele bukomo bwa kunyanta pa banyoka ne pa tuminye.” (MB)

Yesu uyukile amba, kupwa kubutulwa kwa Bulopwe bwa Leza mu kitatyi kya ku mfulo, Satana ne bademona bandi bakapangwa mūlu. Ino kuno kupangwa kwa bademona kebamonwe na meso kobapangwa na bantu bitupu i buluji bukwabo bulombola’mba kino kinkumenkume kekikabulwepo kufika. Pa kino, Yesu walombola kwelwa panshi kusa kwelwa Satana tamba momwa mūlu bu kintu kikalongeka binebine. Nanshi bano 70 i bapebwe lupusa lwa kutyimpa banyoka ne tuminye mu muneneno wa kyelekejo. Ino Yesu wanena’mba: “Ino kemukasepelela pa bademona bakwimukōkela, nanshi sepelelai pano pa majina enu kulembwa mūlu.”

Yesu wasangala kashāa, katumbija Shandi ku meso a bantu bonso pa mwanda wa kwingidija kwaaingidija na bukomo budi namino bano bengidi bandi benyangwa. Watadīla kudi bandi bana-babwanga kanena’mba: “Dyese ne dyese dya oa meso a kumona byo mumonapo bānwe. Ke-ne-muntu nemunena’mba: Bapolofeto ne balopwe badi bangi bangi badi basaka kumona byobya byo mumonapo, nanshi kebebimwenepo, mhm, kadi kwivwana byo mwivwananga bānwe ne kwibīvwana mpika.” Luka 10:1-24; Mateo 10:1-42; Kusokwelwa 12:7-12.

▪ I kwepi kwasapwile Yesu mu myaka isatu ya mwingilo wandi, ne i mwaba’ka wasaka kusambakanya mu myeji yandi isamba yamfulo?

▪ Yesu watume bano 70 bakatane bantu kwepi?

▪ Mwanda waka Yesu wanena’mba wamone Satana ke mupone kala pano panshi tamba momwa mūlu?

▪ Bano 70 bakokeja kutyimpa banyoka ne tuminye mu buluji’ka?