Shapita 73

Mwine Samadia Uyukile Kubanga Bukwetu

PADI Yesu udi kubwipi na Betani, kibundi kidi ku makilometele asatu tamba ku Yelusalema. Muntu umo upotolwele Bijila bya Mosesa wamufwena kamwipangula’mba: “Abe Mufundiji, lelo nonga namani mpyanepo būmi bwa nyeke?”

Yesu wanañuna kala, amba uno mwana-mulume, mwinē bijila, kepangwilapo kuyuka, ino usaka kumutompa. Kepabulwe padi mpango ya uno mwinē bijila i ya kukimba kuneneja Yesu bintu biteneka Bayuda. Ino Yesu wakwata uno mwinē bijila weponeja aye mwine pa kumwipangula’mba: “Lelo kyokya kidi mu mukanda bālembele namani? Lelo wikitañanga namani nobe?”

Uno mwinē bijila walondolola bintu bilombola’mba walanga bishikate byakalañangapo kashāa, watela bijila bya Leza bidi mu Kupituluka 6:5 ne mu Levi 19:18 amba: “Ukasanswa Yehova Leza obe ne mutyima obe onso, ne muya obe onso, ne bukomo bobe bonso, ne ñeni yobe yonso, ebiya ne mukwenu’nka bwa abe mwine.”

‘Ubalondolola byoloke,’ ye Yesu umutentulula, shi “ulonge kyonka namino ne būmi ukamona’bo.”

Ino uno mwinē bijila katondelwepo. Bino byalondolola Yesu kebimufikilepo pasakila. Ufwila Yesu amwitabije amba milangwe yobe i myoloke, ne amba wi moloke mungya byolongelanga bakwenu. Kaipangula Yesu amba: “Lelo mukwetu kadi i ani le?”

Bayuda bakulupile amba “mukwetu” i Muyuda kete, pamo na mumwenanga bamo amba mo mwikilombwela Levi 19:18. Byabine, mwenda mafuku mutumibwa Petelo usa kunena’kyo, amba: “Bānwe bene muyūkile kala byo kidi kijila kudi amiwa, mwine Yudea kukēsobakanya, nansha kufikila ku umo wa muzo ungi mukwabo.” O mwanda uno mwinē bijila, dimodimo ne bana-babwanga ba Yesu bene, bakulupile amba kwikala’bo boloke i kulonga biyampe ku Bayuda kete, mwanda mungya milangwe yabo, bantu bakubulwa kwikala Bayuda ke bakwabopo.

Lelo Yesu usa kulondolola bemvwaniki bandi namani pampikwa kwibafityija mityima? Wabanga mānga imweka bu yalongekele’nka panopano. Amba: “Muntu umo [Muyuda] wadi utūkila ku Yediko, ufunduka ku Yelusalema, ebiya waponene mu bakabwalāla, bamuvula bivwalwa, ne kumukupila ponka, ebiya bafunduka bamushia mupungile.”

‘Penepo, mu kwitulukila’tu,’ ye Yesu ukisekununa, “[kitobo] umo wadi utūkila mu dyonka’dya dishinda, ino’mba ngele meso mankuma, aye kapite kufula kufula. Kadi mwine Levi monka, enka nabya, kwiya kwādi kumutala bitupu, kapite kufula kufula. Kadi ungi, aye mwine Samadia, byādi mu lwendo wafikile kwādi, ebiya pa kumumona, ino wamukwatyilwa lusa.”

Babitobo bavule ne bene Levi bakwashi ba mu tempelo bashikatanga mu Yediko, bendanga lwendo lwa makilometele 23 mu dishinda dya byaka bivule, dipulumuka matelo a metele 900 kutamba ku tempelo kobengilanga mu Yelusalema. Babitobo ne bene Levi bo badi ba kukwasha Muyuda mukwabo udi mu bikoleja. Ino kebamukweshepo. Talapo mwine Samadia’ko wamukwasha. Bayuda i bashikwe bene Samadia mpata, abe mwine uyukile kala muswelo obasholele Yesu mutonko’nka panopano, bamwita bu “mwine Samadia.”

Lelo mwine Samadia walonga kika mwanda wa kukwasha Muyuda? “Wamufwena pa bwipi,” ye Yesu unena, “wamulamika bilonda, kupungulwilapo mani ne vinyupo, ebiya wamutentamija ponka pa nyema wandi, ino wamuletele ku njibo ya bweni, kamulelele. Ebiya dyakesha dikwabo pa kutaluka kwenda wasokwele ndenadi ībidi ya lupeto [kisengele mfutwa ya mafuku abidi], wapana ku mwine njibo, ino kamunena’mba: Mulele biyampe, kadi byonso bikwabo byōkamwelelelapo ami nami pa kwiya dikwabo nkakulubwila’byo.”

Yesu upwa’tu kubanga ino mānga, waipangula mwinē bijila’mba: “Lelo abe ku mutyima’mba namani? Wamwalamukila ke mukwabo, wa yewa waponene mu bakabwalāla, ku boba basatu, i wepi le?”

Mwinē bijila pa kumona’mba kutendela mwine Samadia ke biyampepo, walondolola’tu amba: “Ke yewa wamufwila lusa kadi!”

“Enda nanshi nobe kalonge’nka namino,” ye Yesu ufudija.

Shi Yesu wadi amba ulombwedidile’tu mwinē bijila’mba bantu bakubulwa kwikala Bayuda nabo i bakwabo, longa uno muntu kapelelepo uno mwanda bunka bwandi, bantu bavule badi ba kumwitabila mwanda wa kupatanya Yesu. Inoko ino mānga ya bintu bilongekanga nyeke ibalombola pampikwa lupata’mba bantu bonso i bakwetu, nansha i ba musaka ungi nansha i ba muzo ungi i bakwetu. Bine, uno mufundijijo wa Yesu i wakutendelwa kashāa! Luka 10:25-37; Bilongwa 10:28; Yoano 4:9; 8:48.

▪ I kipangujo’ka kyaipangula mwinē bijila kudi Yesu, ne mobimwekela i mpango’ka yadi nayo pa kwipangula kino kipangujo?

▪ Le Bayuda bakulupile amba bakwabo i bāni, ne i kika kilombola’mba ne bana-babwanga nabo badi na uno mumweno?

▪ I muswelo’ka waleta Yesu mumweno moloke keukokeja kupatanya mwinē bijila?