Shapita 78

Endelelai na Kutengela!

YESU wapu kudingila bibumbo ku bya kusakasaka, wakome ne bandi bana-babwanga kuleka bya kupīpidila ku bintu bya kungitu, kaebakankamika’mba: “Bānwe kaluombe katyetye! Kemukikwatwa moyo, mwanda Shenu i mutōkwe pa mutyima kwimupa bulopwe.” Wasokola mwanda, amba i enka kibalwa kyepele (kyāyukilwe mwenda mafuku bu boba 144000) kyo kikekala mu Bulopwe momwa mūlu. Bavule mu boba bakapebwa būmi bwanyeke, bakekalanga pano pantanda bu babikalwa mu buno Bulopwe.

“Bulopwe,” i kyabuntu kyakutendelwa! Pa kulombola bandi bana-babwanga kyobafwaninwe kulonga’po mwa kukebutambwila, Yesu webanena’mba: “Kapotejei bintu byo mudi nabyo ebiya kapei ku balanda.” Eyo, bafwaninwe kwingidija bintu byobadi nabyo mwanda wa kukwasha bakwabo kumushipiditu, nabya abebikila “kyabuleme kyampikwa kupwapo mūlu.”

Kupwa Yesu wakankamika bandi bana-babwanga batengele kujoka kwandi. Amba: “Mwikale kwiningija, kadi kinanu kyenu kīkale kutēma. Kadi bānwe dingakanai pamo ne boba badi batala Mfumwabo, ebiya pākajoka ku masobo a butundaile, afike ku tutula ino panopano ponka bamushitwila. Nanshi bo badyese ne dyese boba bapika bakutānwa ne Mfumwabo pa kufika, bamutengela; i binebine nemusapwila’mba: Aye ukēningijanga, ebiya akebashikatyije ku bidibwa, ino [u]kafwena k[aebengidila].”

Mu kino kyelekejo, kutengela kutengele bano bengidi kujoka kwa mfumwabo i kumweke mu kukonya kobakonyenye mitwelo yabo milampe yobesomene mu bikaya byabo ne mu kwendelela na kuvuija biselwa byabo kufikija ne bufuku na kitōkeji kya binanu biyule māni bā. Yesu washintulula’mba: ‘Shi mfumwabo waiya pa kilo kyabubidi [tamba pakatwelanga badi beija, kutūla mu kankatyi ka bufuku], nansha pa kilo kyabusatu [tamba mu kankatyi ka bufuku kutūla padila banzolo babedi ku lubanga], webatana batengele, bine dyese i dyabo!’

Mfumwabo ukafuta bengidi bandi byakebafutyile kashāa. Ukebeta bidibwa ku meza kaebengidila. Kakebamonepo bu bapika, ino ukebamona bu balunda nandi badikōkeji. I mpalo milumbuluke’po kashāa yobapelwa kwendelela kobaendelela na kwingidila mfumwabo bufuku bonso koku belaija kujoka kwandi! Yesu wafundija’mba: “Ino bānwe tengelai enka nabya, mwanda Mwanā muntu wiya pampikwa ne kumutá mutyima.”

Pano Petelo wamwipangula’mba: “Abe Mfumwetu le lukindi luno’lu i lwa bātwe bonka’ni, le i lwa bonsololo?”

Pa kyaba kya kumulondolwedidila, ino Yesu waleta’po kyelekejo kikwabo. “Lelo aye kalama wa bine[bine] i ani le?” ye Yesu wipangula, “ukalupulwa kudi Mfumwandi ke kalama wa kipango kyandi kwabanya bidibwa mwendela ki[pim]o ne [pa kitatyi kifwaninwe]. Ke ye wadyese ne dyese yewa mupika ukatānwa ne Mfumwandi pa kwiya, ulonga’nka namino. I bine byo nena nenu amba: Ukamulupwila ke kalama mukatampe wa bintu byandi byonsololo.”

I bine, uno ‘Mfumu’ i Yesu Kidishitu. “Kalama” i “kaluombe katyetye” ka bana-babwanga bonso pamo, “kipango” nakyo kifunkilanga enka pa kisumpi kimo kyonka kya bano 144000 bakapebwa Bulopwe momwa mūlu, ino kino kishima kilombolanga patōka mingilo ya umo ne umo wa mu abo. “Bintu” bilamwa na kalama wabinebine i tumweno twa bulopwe twa pano pantanda twa mfumwandi, kubadila’mo ne boba bakabikalwa na buno Bulopwe pano pantanda.

Yesu waendelela na kyelekejo kyandi, ulombola’mba ke bantupo bonso babundile kitango kya kalama witwa ne bu umpika bakekala na dikōkeji, washintulula’mba: “Shi yewa mupika unene munda mwandi’mba: Mfumwami uno waije pa kwiya, penepo ino ālule kukupila bapika, ne banā-balume, ne bāna-bakaji nabo kumo, ino ne kudya, ne kutoma ne kukolwa ponka. Nanshi Mfumwandi wa yewa mupika pakāya mu difuku dyampikwa kumukulupilwa . . . , aye ukakupilwa bikatampe bīne.”

Yesu walombola amba kwiya kwandi i kupaile Bayuda bitatyi bipyana mudilo, mwanda bamobamo bamwitabija ino bakwabo nabo bafutulula bufundiji bwandi. Yesu wabatyijibwe mu mema kepadi myaka isatu ne kupita, ino pano, kubatyijibwa’ye mu lufu kekusa kuvuika, mwanenena aye mwine amba: “Nakolelwa’mba: Nsaka nanshi [k]ufikidilepo.”

Kupwa kulombola bandi bana-babwanga ino myanda, wasapwila’mo ne bibumbo. Katompola mutyima wabo mūmu obapela kuyuka kilomboji kimwekelele kimuyukanya ne buluji bwakyo bwine. “Po mumonanga dikumbi dīya dikanda kushika,” ye aye wibanena, “ponkapo ke munena’mba: I mvula wa kinya kimo unoka, nanshi i monka. Ebiya shi luvula lwa dibanga lubataluka, ke munena’mba: Dyekese dibafika, nanshi i monka. Yō! bānwe banzazangi! lelo byo muyūkilepo kushintululako bya ntanda ne diulu, lelo i kika kimukende kushintululako bino bya uno mwaka?” Luka 12:32-59.

▪ I bantu banga babundile “kaluombe katyetye,” ne kadi bakapebwa bika?

▪ I muswelo’ka walombola Yesu amba bengidi bandi bafwaninwe kutengela?

▪ Mu kyelekejo kya Yesu, ‘mfumu’ i ani, ne “kalama,” ne “kipango,” ne “bintu”?